1 MAKABEO 7
7
Na harikatoha iaterua o Alakimo mo Temeterio
(2 Makabeo 14.1-36; 15.1-36)
1Igê na harisi 151 o Temeterio karena o Seluku ki pania i Roma ma ki goto i ta na hinua igê na tarasini henira ta kereani na mane. Ngaia ki hagarongo renia marena i ngekana vi ngaia ki maneraha. 2Matena i banu i ruma raha iata na maneraha na êvarina, na mane ni me iana ka hagatotongorerua na rimata o Antioko ma o Lisiasi. Ngaira ka tako, viga torererua tanga o Temeterio. 3Matena o Temeterio ki rongo vikana, ngaia ki vi: “Inê kê pe pasi bâsirerua.” 4Ngekana na mane ni me ka nahuhunirerua, ma o Temeterio ki maneraha so nga ngaia.
5Hemuri na Siu hato ga aharê igê na ramata ma ka rumakaka renia na rotu, ngaira ka râ i pasina o Temeterio. O Alakimo, i obania vi mane ni vogasiha i teha, ngaia kani bêngenira. 6Ngaira ka tamasi erasira na ani getera na Siu, ka vi: “O hegoata o Juta ka bani mutera na ara ni enoni hato ga pane henigo, ma ka bani paigami hura tenia na apanena iamami. 7Igami kami nungigo, vigo hagatorangenia ta na mane go tako togo renia, hanana i bâsigi na nahuninga iamami ma na apanena iana na maneraha, ga bani hagaerasigi o hegoata o Juta, ma ki hagaitangira ngaira ma na enoni hato ga tamanira.”
O Bakitesi i Jutea
8Na maneraha o Temeterio ki atea o Bakitesi na hitangita na mane ni hagaotonga iana i bâsuria na apanena kereso i ve i Uparatesi. Ngaia ki nahuni ramoha igê na arahanga iana na maneraha ma ki totosuria. 9Na maneraha ki hagatorangenia henia ngaia o Alakimo, i pe botage renia God ma na maneraha ki bani atea ki mane ni vogasiha i teha. Na maneraha ki bonasia o Bakitesi hanana i hagaitangira na Siu. 10Ngairerua karu pania i Antioko henira na mane ni me gahu ma ngaira ka ata i Jutea. O Bakitesi ki uhungia vi hagaparura o hegoata o Juta, suria i hagatorangenira na mane tora tamasinga tangara, ka tamasi renia na marapeha tangara. 11Ma na matena o hegoata o Juta ka bâsira na mane ni me gahu ga ata me henia, ngaira ka pe tongesurira na mane tora tamasinga ngegana.
12Tani na mane ni hagesuringa renia na rotu ka arâ i pasiterua o Alakimo ma o Bakitesi, hanana ga tamasi renia na otoha. 13Ngaira ka na Gasiteo, ga rotu koro ma ka pane henia o Juta. Ngaira ka na Siu, na ani ga hagenago ka nungirerua o Alakimo ma o Bakitesi renia na marapeha. 14Ngaira ka tako, ka vi: “Henaka na mane ni me ka gahu, o Alakimo ngaia ki na mane ni vogasiha tenia na varo ninuni iana o Arone ma ki asa vige hagaerasigia.” 15O Alakimo ki koro tangara ma ki tohe, ki vi: “Igami kami pe râ me hanana vigami hagaerasigamu igamu se vi na tamami.” 16Ngekana ngaira ka tongesuria, ma ngaia ki rakura na 60 na hitangita ma ki nahuira ka me igê nga na tangiana gi tage. Ngekana ngaia ki hagamonaria na tamasinga i na buka apuna, i vi:
17“Ngaira ka memerigi totoko na gaputa na kariamu, Araha,
ma ka tokorenigi na gahuata suria i Jerusaleme
ma ki pe tahi tani hanana vige bagigi na gahuata.”
18Matena i akê me vikana, na enoni hato ka magutenirerua o Alakimo ma o Bakitesi, ma ka vi: “Ti kani kahu tongesurirerua? Ngairerua karu pe botage renigi na tarani ga oto. Bâ, ngairerua karu aharêngia na tohenga iaterua.” 19O Bakitesi ki pania i Jerusaleme ma ki tênga i Betesaiti. Ngaia ki bonasira na me iana ka hagatotongora tani na Siu, na ani ga rotu koro, ma ka rako nikâ na ani ga bani kasia na rotu ma ka bani pane henia. Ngaia ki haribona ka mutera ma ka kasira vato igê na kokoro i so ngavê. 20Hemuri o Bakitesi ki kasia o Alakimo ki bâsuria i Jutea, ki nakara so na mane ni me tanga, hanana ga tamania, ma ngaia marena ki aporo tanga na maneraha.
O Alakimo ki gava tenia o Juta
21Hoi o Alakimo ki uhungia nga, hanana vi na enoni ke aganaria, vi ngaia ki na mane ni vogasiha iata i teha. 22Na ara ni me ga oga sutaga tangara na enoni ka pane henia. Ngaira ka naka i Jutea igê na raramohata ma ka hagamamasiagara ngavê na Siu. 23O Juta ki bâsira vi o Alakimo ma na mane ni me iana ka hagamamasiagara ngavê na Isiraelita teharira na enoni ahuroto. 24Tahema ngaia ki râhia i Jutea hagenani, hanana i hagaitangira na me hato ngegana, ga pane henia o Alakimo ma ki tênganira siana ka hotohoto. 25Matena o Alakimo ki tahetara vi o Juta ma na me iana ka raramohaga ngavê ma ki girara so vi ngaia ki page so renira, ngaia ki aporo tanga na maneraha ma ki torahurira renigi na tarani ga erataga ngavê.
O Juta ki teharia o Nikanore
26Tahema na maneraha ki hagatorangenia o Nikanore. Ngaia ki na hitangita na mane ga bêngenira na mane ni me ma ki rongo raha na atana. Ngaia ki kitenira na Siu, ma na maneraha ki bonasia, hanana i hagamagahurura ngavê na Siu. 27O Nikanore ki ata i Jerusaleme henira na mane ni me gahu. Ngaia ki uhungia vi hagabekasira o hegoata o Juta, suria i vi, vi ngaia ki obania vi tamasi renia na marapeha. 28Ngaia ki vi: “I pe arari vige gâga na hearihatana i berarogakerua. Inê kê page vatugigo me henira ta kereani ma na enoni, hanana igerua karu tamasi igê na marapeha.” 29Ngaia ki vatugia o Juta ma ngairerua karu hagaramoramo ma vigaru ageagesirerua heri. Ma na merongana o Juta ka nanê viga ranguia hanana viga megava. 30Matena o Juta ki girara, vi o Nikanore ki harikato renia, ngaia ki magu ma ki usi vige bâsia nikâ. 31Matena o Nikanore ki tahetara, vi o Juta ki girara na harikatoha iana, ngaia ki pania i Jerusaleme, hanana i meaheariha o Juta hagarangia i Kaparasalama. 32Na ararina na 500 na mane ni me iana o Nikanore ka me, ma na ani ga tahi na mane ni me ka gava ka ruku igê na hinua iana o Tavite.
33Hemuri o Nikanore ki râ i hungana i Sione. Tani na mane ni vogasiha henira tani na meraha iata na enoni, ka hura me tenia na ruma ni rotu ma ka râ vurusia ma ka metamasi maninga ma. Ngaira ka hagabâsia, vi ngaira ka susu ka nungia God tanga na maneraha. 34Ma ngaia ki rurusira ma ki meramarabe. Ngaia ki pusurira, hanana vi siana ka vogasi nikâ. Ngaia ki tamasi paroparo ngavê. 35Igê na mangariaganiha iana tangara ngaia ki hagamagahurura, suria i tohe, ki vi: “Manga gê pe taura i ngekê nga o Juta ma na mane ni me iana, inê kê page hagamakaka na ruma ni rotu, matena gê aporo bâkoro i murina gê teharira.” Ngaia ki reke ni mangariaganiha.
36Na mane ni vogasiha ka bani aporo igê na mahera na ruma ni rotu ma ka ura ka maatirerua na bea ni vogasiha ma na kiboru apuna. Ngaira ka angiangi ma ka nunginungi, ka vi: 37“Araha, igo ko atea na ruma ni rotu ikê tangago maremu hanana vi na enoni ka rahesigo ma ka avarasigo igê. 38Hoi, gu tamanira na kariamu. Gu hagaitangia na mane ngekana henira na mane ni me iana. Nakara vê ke me igê na hearihatana. Siana ka tahitahi tani. Takusia vi ngaira ka tamasi erasigo ngavê.”
39O Nikanore ki hura tenia i Jerusaleme ma ki râ ki tênga i Bete Gorone. Na mane ni me ni Siria ka hakunia i ngekana. 40O Juta henira na 3000 na mane ni me ka tênga i Atasa. I ngekana o Juta ki nunginungi igê, ki vi: 41“Araha, na buka apuna ki vi, vi na matena na mane tora tamasinga iana na maneraha ka tamasi erasigo, na angero iamu ki arâ me ma ki mutera na 185.000 na mane ni me iana. 42Hoi, gu menamenarira vikana nikâ na mane ni me ngegana i maamami, i ngekê nga, hanana na enoni hato ka page girara, vi igo ko hagaitangia o Nikanore, suria i tamasi erasia na ruma ni rotu apuna iamu. Gu hagaitangia araria na bagatauhana.”
43Igê na tangahuruta matare oru na tangiana igê na hageha na Atare na hearihatana ki raboa. O Juta ki teharia o Nikanore henira na mane ni me iana. Ngaia nga o Nikanore kani me hagenago igê na hearihatana. 44Matena na mane ni me iana ka bâsia vikana, ngaira ka kasi so na tangaruha iata ma ka gava. 45Na Siu ka tarigenira suria na tangiana hagenani, haganega tenia i Atasa mataro me i Gesere. Matena ga tarigenira, ngaira ka ama ni uhigi nga na ahuri ni hearihatana. 46Na Siu igê na hinua i ngekana ka hura me ka taharira na mane ni me ga gava ma ka ura pusigi na tara. Tahema na merongata ka kariarigu bê aporo ma ka tora i matota na Siu ga tarigenira. Ngaira hato ka me igê na hearihatana. I mareha rârâ vige tahi tani.
47Na Siu ka rurugu tenira na merongata. Ngaira ka retenguria na bêna o Nikanore henia na rimana na otona i hagaramo renia. Ngaira ka torererua na bêna ma na rimana, hanana ga hagabâbângenirerua i metara i Jerusaleme. 48Na Siu ka vagevage teha ngavê ma ka hagarahasia na tangiana ngekana. 49Ngaira ka naka na ramata, vi na tangahuruta matare oru na tangiana na hageha na Atare ka na tangiana raha, i tuguhira viga hagahigasia i na ara ni harisi. 50Hoi, i Jutea ki oga igê na marapeha sisite râ ma.
Currently Selected:
1 MAKABEO 7: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific