1 MAKABEO 6
6
I me na heta o Antioko
(2 Makabeo 1.11--17; 9.1--29; 10.9--11)
1Matena na heta na maneraha o Antioko ki aharêvoro i Mesopotamia, ngaia ki rongo tarohana i Elemaisi na hinua i Pesia vi i ngekana ka rako igê na siliva ma na golo. 2Na ngêsu ka rako teha ngavê igê na golo, na bêata, na tangaruha ma na marâ getigi tanga na hearihata, o Alesanta o karena na maneraha o Pilipo i Masetonia ki bani nakagi so i ngekana. O Pilipo kani hagenago ki maneraha i Masetonia. 3O Antioko ki râ ki henahuraua na hinua ngekana ma ki rurugua, ma ki bara tanga, suria na enoni i ngekana ka bani rongoa na katoha iana. 4Tahema ngaira ka unihakura me na mane ni me iata, hanana viga rêrapusia. Ngaira ka sugaria bê aporo o Antioko. O Antioko ki aporo i Babilonia ma ki era ngavê na obana.
5Matena o Antioko i gâga mênga i Pesia, na mane tora tamasinga ki râ me ma ki hagarongoa, vi na mane ni me, i bani hagatorangenira tanga i Jutea ka bani so igê na hearihatana. 6Na Siu ka sugarira o Lisiasi ma na mane ni me ramo iana ka gava. I ngekê na Siu ka ramo teharia i nago, suria ga nahunigi rako na tangaruha ma na marâ getigi, ga rurugi tenira na merongata. 7Na Siu ka bani hogea na Marâ ni Eraha, o Antioko ki bani naka igê na bea ni vogasiha i Jerusaleme. Ngaira ka bani pararihia na ruma ni rotu renigi na para ga akê ngavê, manga i nago. Ngaira ka bani henahuraua i Betesure na hinua iana na maneraha, na hinua ni para nganganihaga.
8Matena na maneraha ki rongo vikana, ngaia ki baku ma ki gasuga raha. Ngaia ki râ ki oga i bana iana ma ki kahu maeha, suria i nahuia na takoha, suria ga pe akê me na marâ manga i obanigi. 9Ngaia ki maeha arihu. Na petakotogoana ki ama ni nahuia nga. Ki rârâ ma ki girara so, vi ngaia ki sugi meme. 10Tahema ngaia ki unira me na tamana koro ma ki vi tangara, ki vi: “Inê ki bara tangê vi ve mêru. Na hetakiha ma na anumanumaha ka aharêsia na aitangihaku. 11Hagenago inê kê hagateê mareku, kê vi, tanu hega na mamasiaganiha ngegana kaniga aharêsiê, suria vari inê ki na maneraha gê koro ma na enoni ka obaniê bâraha. 12Ma hemuri inê kê kahu takusigi aporo na tarani era gê katogi i Jerusaleme, suria inê kê rurugugi na ara ni marâ na siliva ma na golo tenia na ruma ni rotu ma kê uhungia vigê mutera purupuru na ai ni Jutea. 13Tahema na bagabevoani ngegana ka tarahuê ma kê haga ni me renia na petakotogoana igê na agua getea.”
14Hemuri ngaia ki unia o Pilipo, na hitangita na mane ni hagaotonga i tako togo renia. Ngaia ki kasia ki bâsuria na apanena hagenani i marungia. 15Ngaia ki vatea renigi na tarepuri, na tuguni ma na ringi ga marisina na maneraha, ma ki bonasia, hanana i hagesuria na rimata o Antioko o karena, hanana i voravora re na maneraha urusia. 16Na maneraha o Antioko ki me i ngekana igê na harisi 149.
17Matena o Lisiasi ki rongo vi na maneraha ki me, ngaia ki katoa o Antioko sisite ki maneraha urusia o vaemana, suria ngaia ki hagesuria me matena i sisite. Ma i ngekê ngaia ki hêtana vi Upatore.
O Juta ki ogarihia na ruma na para nganganihaga i Jerusaleme
(2 Makabeo 13.1-26; 11.22-26)
18Na merongata na Siu ga oga igê na ruma na para nganganiha i Jerusaleme ka hagabarasira na Isiraelita hagarangia na ruma ni rotu. Ngaira ka katogi hagavora na perenga tare tangara na Siu ma ka tamanira na ahuroto. 19Tahema o Juta ki kato vi mutera. Ngaia ki unihakura na enoni hato, hanana viga gâga rihia na ruma na para nganganihaga. 20Na enoni ka haku me ma ka haganega ka ogarihia na ruma na para nganganihaga igê na harisi 150. Ngaira ka tagarahia na bea ni tahariha ma na bogoni na apinige ni tahahakurunga.
21Ma tani na mane ni me ka tara hura i berarogata na enoni ga ogarihia na ruma na para nganganihaga. Ngaira ma tani na Siu ga rumakaka renia na rotu ka râ i pasina na maneraha. 22Ngaira ka vi tanga, ka vi: “Go gâga rârâ ki manga i he ma ko kahu tamanigami, ko barugi aporo na mamasiaganiha iata na goamami ngegana? 23Igami kami agana kami tamania tare o vaemamu. Igami kami têtê viteana tare ma kami arâ surigi na bonasiha iana. 24Ma na ta ki vora tangagami? Bâ, i ngekê na goamami ka merongasigami. Ngaira ka mutera na ani mavê na hitangimami ga tarahura ma ka hanagogi na nahuninga iamami, 25ma ki mareha vi igami ma kani viga hagamamasiagagami. Ngaira ka taharigi nikâ na ara ni apaneni hato go marungigi. 26Ma i ngekê ngaira ka ogarihia na ruma na para nganganihaga ma ka kato viga henahuraua. Ngaira ka bani pararihirerua na ruma ni rotu ma i Betesure. 27Manga go hagarihu sisite râ ma, ngaira ka page akê me henigi na tarani ga erataga ngavê teharia i nago ma ki kahu barabara tangago vigu urapusira.”
28Matena na maneraha ki rongo vikana, ngaia ki mangariaga ngavê. Ngaia ki unihakura me na mane hato ga bêngenira na mane ni me, na ani ga tavo uga ma na ani igê na hosi, henira na mane ni hagaotonga i tako togo renira. 29Nikâ ngaia ki vatevatera na mane ni me tenigi na agua getigi tenigi na marê. 30Na mane ni me hato iana ka vora na 100.000 ga tavo uga, na 20.000 na mane ni me igê na hosi ma na 32 na elepante ni hearihatana. 31Na maneraha ma na mane ni me iana ka aharêvoro i Itumea ma ka ogarihia i Betesure. Ngaira ka meheariha arihu era. Ngaira ka tagarahigi na bogoni na apinige ni tahakurunga ma na bea ni tahariha. Ma na mane ni me i rarona na hinua ka meraheariha ramo bê aporo. Ngaira ka gahahura ma ka sungigi na bea ni tahariha iata na merongata.
Na hearihatana i Betesekaria
32Hoi, o Juta ki bonasira na mane ni me iana ka naka vê noga na ogarihiana na ruma na para nganganihaga i Jerusaleme. Ngaia ki tênga i Betesekaria i avorana na tênga iana na maneraha. 33Igê na mahogotana na maneraha ki hatani merarâ na mane ni me iana igê na tara tanga i Betesekaria. I ngekana na mane ni me iana ka ura harahara tanga na hearihatana ma ka uhigi na ahuri. 34Ngaira ka hagasiginira na elepante renigi na tavoni na vaini ma na guani na apinige getea, hanana ga pasi heariha. 35Ngaira ka tonganira na elepante surigi na harahara na mane ni me ga tavo uga. Na rehagaro gi tage na mane ni me tanga na ani gi tage na elepante. Na mane ni me ngegana ka tuguni renigi na tuguni na seni ga hêrigi ma ka nakagi na hati na kapa i bêta. 36Nikâ na 500 na mane ni me igê na hosi tanga na ani gi tage na elepante, ga arâ henia tare. 37I gerina na ara ni elepante ka rugia igê na bea na apinige ma na kere ruma na bebetehe nganganihaga ki oga igê ma ki buhia. I rarona ka oga igê na vera oru na mane ni me henia na mane i hagaotoa na elepante. 38O Lisiasi ki nakara na mane ni me getera igê na hosi ka râ hetangenira, tani i otoni na harahara na mane ni me ga tavo uga ma tani i mahani, hanana ga anumasira na me ngegana, ma hanana nikâ ga meraheariha na merongata. 39Na bêata na golo ma na kapa ka togatoga, matena i takirigi na arito ma na râhahanegani na hungani ka togatoga ma ka mave mangagi na ahame ga vavata. 40Na mane ni me hato iana na maneraha ka guruge harahara bâkoro tanga na hearihatana, tani igê na râhahanegani ma tani igê na bena. 41Na enoni hato ka bubununuga, matena ga rongogi na tangaruha ga hetagitagi ma na akurukuruhani na tavo ugana iata na mane ni me ramo ma gahu.
42O Juta ma na mane ni me iana ka taharira ma ka mutera ototo râ nga na 600 na mane ni me iana na maneraha. 43O Eleasare Avarane ki bâsia vi ta na elepante ki raha teharira na ani getera ma ki aruha renia na kapa manga na anina na maneraha. Ngaia ki takusia ma vi na maneraha kani igê. 44Tahema ngaia ki kasi manavana, hanana vi hagatahira na kariana ma ke rongo raha tare na atana. 45Ngaia ki pe koke ma ki tango tanga na elepante i berarogani na harahara na mane ni me ga tavo uga. Ngaia ki nahu tangotango renira na ani i otona ma i mahana. Na merongana ka sugare bê aporo i otona ma i mahana. 46Ngaia ki sivabanu i ruguhana na elepante ma ki ahura hunia. Na elepante ki apuri huria ki me. 47Matena na Siu ka tahetara renia vi na mane ni me iana na maneraha ka ramo teha ngavê ma ka togeaga igê na hearihatana ngaira ka sugare bê aporo.
Na ogarihiana na ruma ni rotu
48Na maneraha ma na mane ni me iana ka râ ka meraheariha na Siu i Jerusaleme. Ngaia ki ogarihia i Jerusaleme ma ki hagabarasigi na tara tanga i Jutea hagenani. 49Ngaia ki katoa na marapeha henira na Siu i Betesure. Ngaira ka pania na hinua iata, suria i marehasira na ngêra, suria ngaia ki na harisi ni mamaroha, ga pe tagarahigi na mu igê. Tahema ki bara tangara vige urapusia na ogarihiana. 50Na maneraha ki têa i Betesure ma ki nakara igê na mane ni me, hanana ga anumasia. 51Hemuri ngaia ki ogarihia na ruma ni rotu arihu era. Ngaia ki tagarahigi na bea ni tahariha, na bogoni na apinige ni tahakurunga, na marâ tanga ga arihatenigi na gi ma na hê, ma na tangaruha getigi tanga ga arihatenigi na ora ma na bagahê raha. 52Ma na Siu i rarona ka tagarahigi nogata na tangaruha, hanana ga meraheariha bê aporo na merongata renigi. Ma ngekana ngaira ka heariha surigi rako na tangiani. 53Na kiboru ni ngêra i ruma ni rotu ka baguru, suria ngaia ki na harisi ni mamaroha, ma na enoni ga bani gava tenira na enoni ahuroto ma ka ruku i Jutea, ka bani hatungigi na ngêra, ga bani nakagi igê. 54Na ngêra ki abubu ngavê. Tahema na enoni rako ka bani totoko surigi na hinua iata. Na kereani ma na mane ni me kaniga oga so i ruma ni rotu.
Na rimata o Antioko ki katoa na marapeha henira na Siu
55I na matena ngekana o Pilipo, na maneraha i bani atea i nago tarana i me, hanana vi hagesuria o karena ki maneraha, 56ngaia ki aporo tenia i Pesia ma i Metia. Ngaia ki meraporo me na mane ni me iana na maneraha ma ki kato vi taua ngaia na gavumane. 57Matena o Lisiasi ki rongo vikana, ngaia ki hatani kato vi aharaga. Ngaia ki vi tangara na maneraha, na mane ga bêngenira na mane ni me ma na mane ni me iana, ki vi: “Igia ka ama ni mameaga nga. Igia ka abubu renigi na ngauha. Na agua ga ogarihia, ki na para nganganihaga. Ma nikâ na tagaraha na gavumane ka hagasugia. 58Hoi, ge hagaotogi na berarogaka igia ma na Siu ma ke katoa na marapeha henira na Siu ma na Isiraelita hato. 59Ge nakara vê ke râ surigi na ramata ma na tauhata mareta manga i nago. Ngaira ka mangariaga ma ka merongasigia, suria igia ka hatungigi na ramata ma na tauha iata.”
60Na maneraha ma na mane ga bêngenira na mane ni me ka aganaria na tamasinga ngekana. Hoita o Lisiasi ki tamasigi na tarani na marapeha tangara na Siu ma ngaira ka aganarigi. 61Na maneraha ma na mane ga bêngenira na mane ni me iana ka tohe viga marupegi na tarani ni marapeha ngegana. Vikê na Siu ka hura tenia na ruma ni rotu. 62Matena na maneraha ki banu i ruma ni rotu i hungana i Sione ma ki bâsigi na bagapara nganganihaga raha, ngaia ki aharêngia na tohenga iana, suria i haribona, viga hogegi na para rihia na ruma ni rotu. 63Hemuri ngaia ki hatani aharaga ki aporo tanga i Antioko. I ngekana ngaia ki tarahua igê vi o Pilipo ki têa na hinua. Na maneraha ki taharia na hinua ma ki henahuraua.
Currently Selected:
1 MAKABEO 6: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific