1 MAKABEO 5
5
O Juta ki meraheariha na ai ni Etome, ni Amone ma ni Giliata
(2 Makabeo 10.14--33; 12.10--45)
1Matena na ahuroto igê na agua hagarangi ka rongo, vi na Siu ka bani tagarahirerua na bea ni vogasiha ma na ruma ni rotu, karu bâ manga i nago, ngaira ka mangariaga ngavê. 2Tahema ngaira ka kato, viga mutera na Siu hato ga oga i berarogata. Ngekana ngaira ka haganega ka nahuira ma ka mutera na Siu.
3Na ai ni Itumea ka taharira na Isiraelita i Akarabatene. Tahema o Juta ki râ ki meraheariha. Ngaia ki nahuira ngavê ma ki rurugu tenira. 4Ngaia ki taharira nikâ na ai ni Baiane ga hagamakukura tare na Isiraelita, suria ngaira ka ahiahi karira ma ka gahasira na Isiraelita, ga arâ i tara i ngekana. 5Ngaia ki purusira na ai ni Baiane igê na hinua ni para nganganihaga iata. Ngaia ki tohe vi mutera. Ngaia ki sungigi na hinua ni para nganganihaga iata henira na ai ni Baiane hato igê.
6Hemuri ngaia ki taharia i Amone. I ngekana ngaia ki tarahura igê na hakuta raha na mane ni me ramo, i bêngenira o Timoti. 7O Juta ki meraheariha hagarako ki rârâ ma ki teharira. 8Ngaia ki henahuraugi i Jasere henigi na hinua hagarangia ma ki kahu aporo i Jutea.
9Na enoni ahuroto ni Gileata ka haku, hanana viga taharira ma ka mutera na Isiraelita ga oga i berarogata. Ma na Isiraelita ka gava tanga i Tatema na hinua na para nganganihaga. 10-11Ngekana ngaira ka kasia na leta tangara o hegoata o Juta, ka vi: “Na enoni ahuroto rihigami ka haku me viga mutegami. O Timoti kani bêngenira. Igami kami bani gava banu igê na hinua na para nganganihaga kami ruku igê. I ngekê ngaira ka sugi henahuraua na hinua ma ka mutegami. 12Ga rako na hitangimami ga bani me. Râ me, kamu hagatahigami.
13Ngaira ka bani mutera na mane hato na Siu i na apanena i Tobe, ka bani henahuraura na gete iata henira na kareta ma ka bani rurugugi na nahuninga iata. Na ararina na rehagaro na mane ka bani mute.”
14Na leta ngekana ka tomania mênga, matena na ani getera na mane tora tamasinga ga ata me. Ngaira ka bani tarisigi na tuguni iata, suria i rugu na obata. Ngaira ka torea me na rongoha tenia i Galilea. 15Ngaira ka vi: “Na mane ni me tenigi i Potolemaisi, i Taire, i Sitone ma i Galilea hagenani ngaira ka haku, hanana viga mutegami.”
16Matena o Juta ma na enoni ka rongo vikana, ngaira ka katoa na hekarigiana raha, hanana viga tamanira na goata ga mamasiaga ngavê, suria na merongata ka taharira. 17O Juta ki vi tanga o Simone o veogana, ki vi: “Gu atera tani na mane ni me, kamu râ kamu hagatahira na goaka na Siu i Galilea. O vesikerua o Jonatane menê kamuru page arâ i Gileata.” 18O Juta ki panira so i Jutea na mane ni me ga pe râ, hanana ga anumasia. Ngaia ki kasirerua na meraha gi rua o Asaria mo Josepo karena o Sekaria, karu bâsurira na enoni. 19Ngaia ki bonasirerua, ki vi: “Igamurua nga kanimuru bêngenira na enoni agê. Siana kamuru arâ kamuru meraheariha na enoni ahuroto, mataro me kami aporo me.” 20Hoi, na 3000 na mane ni me ka tavo uga henia o Simone tanga i Galilea, ma na 8000 na mane ni me ka tavo uga henia o Juta tanga i Gileata.
21O Simone ki râ i Galilea ma ki meraheariha hagarako na enoni ahuroto i ngekana ma ki kahu teharira. 22Ngaia ki tarigenira rârâ ma ki tariha i hinua i Potolemaisi. Ngaia ki mutera na ararina na 3000 ma ki rurugu tenira. 23Hemuri ngaia ki torera na Siu ga oga i Galilea ma i Arabata henira na gete iata ma na kareta ma henigi na nahuninga hato iata ma ki meraporo tanga i Jutea. Ngaira hato ka vagevage bâraha.
24Igê na matena ngekana o Juta Makabeo mo Jonatane o vesina karu bani tarêhia na ve i Jotano ma ka bani tavo uga banu igê na bagamasusu raha surigi na tangiani gi oru. 25Ngaira ka tarahura tani na Nabateo ga koro tangara ma ka hagarongora renigi na mani tarani ga tarahura na Siu i Gileata. 26Ngaira ka hagarongo vi na ahuroto ka urarihira rako na Siu, ga ruku igê na hinua raha na para nganganihaga i Bosera, i Bosore, i Alema, i Gasopo, i Makete ma i Karanaimi. 27Ma tani ka ruku i hinua sisite i Gileata. Ngaira ka hagarongo nikâ, ka vi: “Na merongata ka bani kato viga taharigi na hinua na para nganganihaga iata na Siu, i gomaha, suria ga obania viga mutera na Siu hato i rarona na tangiana gi tage.”
28Vikana o Juta ma na mane ni me iana ka kariarigu igê na tara i na masusu tanga i Bosera. Ngaia ki henahuraua na hinua i Bosera ma ki mutera na mane hato igê. Ngaira ka rurugua na hinua ma ka hagamakaka. 29Ngaira ka pania i ngekana tanga na hinua na para nganganihaga i Tatema. 30Igê na kahuagana na tangiana o Juta ma na mane ni me iana ka bâsira râ na mane ni me gahu, ga taharia na hinua na para nganganihaga. Ngaira ka toregi na marara, na bea ma na bogona na apinige ni tahakurunga, hanana viga henahuraua na hinua. 31Matena o Juta ki rongogi na rotaha, na ngerengereha ma na ringeni na ahuri tenia na hinua, ngaia ki kahu girara, vi na hearihatana ki kahu haganega. 32Tahema ngaia ki vi tangara na mane ni me iana, ki vi: “Meraheariha na merongaka, kamu hagatahira na goaka na Siu!”
33Ngaia ki bonasira na mane ni me iana ka voasira ka vora gi oru ma ka râ ka haritaha i murita na merongata. Ngaira ka taharira, matena ga uhigi na ahuri ma ka nunginungi raha. 34Matena na mane ni me iana o Timoti ka bâsia râ vi ngaia ka no Juta Makabeo, ngaira ka kariarigu ka gava. O Juta ki tê erasira ngavê ma ki mutera na ararina na 8000 na mane igê na tangiana ngekana.
35Hemuri o Juta ki râ ki taharia na hinua i Atema. Ngaia ki henahuraua ma ki mutera hato na mane igê. Ngaia ki rurugua na hinua ma ki hagamakaka. 36Hemuri ngaia ki râ nga ki henahuraugi i Gasopo, i Makete, i Bosore ma na hinua getigi i Gileata.
37Hato vikana o Timoti ki garira nikâ na mane ni me ma ki tênga i avorana i Rapone i na apanena tarê na ve. 38O Juta ki hagatorangenira tani na me ka râ bâbâ igê na tênga, ma ka meaporo me na rongoha tanga, ka vi: “Na enoni ahuroto hato igê na apanena ngekana ka bani pane henia o Timoti ma ka vora na mane ni me gahu. 39O Timoti ki bani vatevatera nikâ na mane ni me ni Arabia, hanana viga tamania. Na me ngegana ka tênga i avorana tarê na tênga iana o Timoti ma ka nanê viga taharigo igo o Juta.” Ngekana o Juta ki râ hanana i meraheariha.
40Matena o Juta ma na mane ni me iana ka hagarangia me noga na ve, o Juta ki vi tangara na mane ga bêngenira na mane ni me iana, ki vi: “Manga i arâ me ma ki rekereke tarê me hagenago, igia ki bara tangagia vige teharia. Igia ka page soso nga renia. 41Ma ki manga vi ngaia ma ki taunga vê i na apanena tarê, hoi, igia ka rekereke tarê, ka taharia ma ka teharia nga.” 42Matena o Juta ki mataro me i na akerena na ve, ngaia ki bonasira na mane ga segegi na atata na mane ni me, ki vi: “Siana kamu naka ta na mane ni me ki gâga i na apanena ikê. Mu bonasira na ara ni mane ni me ka arâ nga tanga na hearihatana.” 43O Juta ki hagenago ki tarêhia na ve ma na ara ni mane ni me hato iana ka mumuria. Na merongata ka totoko, ka kasigi râ na tangaruha iata ma ka gava tanga na ngêsu i Karanaimi. 44O Juta ma na me iana ka henahuraua na hinua ma ka hagamakaka na ngêsu henira na enoni hato igê. Na enoni ahuroto ki bara tangara vige meheariha bê aporo o Juta, suria ga tê tara renia i Karanaimi.
45Hemuri o Juta ki hagahakura na Siu hato ga oga i Gileata, na ani ga nahuni ramoha ma na ani purua, ma ki mera-aporo tanga i Jutea henira na gete iata ma na kareta ma henigi na nahuninga hato iata. 46Ngaira ka ata i hinua raha i Eperone, i nahunia na para nganganihaga. I bara vige râ rihia i na anima na apanena. Tahema na tara ki banu ototo râ nga vurusia na hinua. 47Ma na enoni i ngekana ka urapusira vige banu vurusia na hinua. Ngaira ka page na hê pusigi na maani para na hinua. 48Ngekana o Juta ki kasia na tamasinga ni marapeha tangara, ki vi: “Mu nakagami kami banu vurusia na apanena iami, hanana mi aporo tanga i pasimami. Igami kami pe râ me tanga vigami erasigamu. Igami kami obania ma, vigami aharêvoro.” Henaka ma ngaira ka usi vige tangahigi na maani para ni hinua.
49Ngekana o Juta ki vi tangara na ara ni Siu hato ka tênga, nga noga ma na mane ni me. 50Ngaia ki bonasira na mane ni me ka nanê, hanana ga taharia na hinua. Ngaira ka meheariha na hinua suria na tangiana ngekana ma suria na bungiana hagenani rârâ ma ka henahuraua. 51O Juta ki mutera na mane hato ni Eperone, ki ruhuruhua na hinua ma ki hogea. Hemuri ngaia ma na mane ni me iana ka tavoraha banu vurusia na hinua. Matena ga arâ, ngaira ka purigi so na gahuata na merongata. 52Ngaira ka tarêhia na ve i Jotano ka banu igê na bena raha i avorana i Betesane. 53Igê na râha hagenani o Juta ki ama ni hagasura nga na enoni ga babeaga ma ki ama ni hagaramonira nga na enoni mataro me ka ata i Jutea. 54Ngaira ka vagevage, matena ga tagere igê na hungana i Sione, hanana ga visia koro God ma ka susu tanga, suria ngaira hato ka aporo me bâkoro ma ki mareha rârâ tani vige me.
O Josepo mo Asaria karu so igê na hearihatana
55Matena o Juta mo Jonatane karu oga i Gileata ma o Simone o goaterua ki taharia i Potolemaisi i Galilea, 56o Josepo mo Asaria, garu bêngenira na mane ni me i Juta, karu rongo, vi ngairerua karu ramo igê na hearihatana ma karu teha. 57Tahema ngairerua karu hetamatamasi, karu vi: “E, nika, garu râ karu meraheariha na merongaka rihigia, hanana ge rongo raha na atakerua.” 58Ngekana ngairerua ma na mane ni me iaterua ka taharia i Jaminia. 59O Sosiasi ma na mane ni me iana ka hura tenia na hinua, hanana ga meraheariha. 60Ngaira ka teharirerua o Josepo ma o Asaria ma ka tarigenirerua rârâ ma ka tariha igê na pereperegana i Jutea. Na ararina na 2000 na mane ni me na Isiraelita ka me igê na tangiana ngekana. 61Na Siu ka so igê na hearihatana, suria na mane garu bêngenira, karu obania vi rongo raha na ataterua ma karu haritohera o hegoata o Juta. 62Nikâ ngairerua karu mareha vi na Makabeo God ki bani atera, hanana vi ga hagatahira na Isiraelita.
63Na Isiraelita hato ma na enoni ga pe Siu ka hagahigasira ngavê o hegoata o Juta. Matena na enoni ka rongo tarohata, 64ngaira ka râ i pasita ma ka vagevagesira.
O hegoata o Juta ka meraheariha na ai ni Etome ma ni Pilisitia
65Hemuri o hegoata o Juta ka râ ka meraheariha na ai ni Etome bêrâ tanga i Negeve. O Juta ki taharigi i Heberone ma na hinua hagarangia. Ngaia ki hogegi na para ni hinua i Heberone ma ki hagamakakagi na bebetehe rihia. 66Hemuri ngaia ki tavo uga banu i Pilisitia ma ki aharêvoro i Marisa. 67Igê na tangiana ngekana tani na mane ni vogasiha ka me igê na hearihatana, suria ga obania vi rongo raha na atata. Ngaira ka bagatatako tanga ga râ igê na hearihatana. 68O Juta ki kariarigu ki râ tanga i Asote i Pilisitia. Ngaia ki hogegi na bea ni vogasiha ni ataro, ki hagamakakagi na nunuta na harasita, ki rugurugugi na hinua iata ma hemuri ki aporo tanga i Jutea.
Currently Selected:
1 MAKABEO 5: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific