Josué 10
10
Imanajeitaqueri ishanincajeitaniri Israel yora amorreopee
1Yora Adonisédec, pincatsaritatsiri anta nampitsiqui Jerusalén, itsaroasanotanaque iquemacotantacariri Josué jeri manajeitacharini carajeitiriri, itsoncajeitaqueri savicatsiniri nampitsipeequi Ai aisati Jericó jeri ivincatsaritepee. Aisati iquemacotaqueri savicajeitatsiri nampitsiqui Gabaón, icantaqueri ishanincajeitaniri Israel: “Tsame aacameetsatavacaajeitea.” Meeca icarajeitaqueri. 2Oshequi catsini itsaroasanojeitanaque, tempa antearoite nampitsi Gabaón, te onquempetearoji Ai, te antearoteji. Timatsi ivincatsarite, aisati oshequi ineaperojeita savicajeitatsiri Gabaón. 3Irotaque itiancacantantacanariri irineane pincatsariyetatsiri: yora Hoham pincatsariventirori Hebrón, Piram pincatsariventirori Jarmut, Jafía pincatsariventirori Laquis jeri Debir pincatsariventirori Eglón. 4Icantiri: “Pimpoque aca, pamitacojeitena. Tsame amanajeiteri savicantajeitarori Gabaón, icarajeitaqueri Josué jeri ishanincapee.” 5Irosati yora pincatsaripee amorreo caratatsiri 5: pincatsariventayetirori nampitsipeequi Jerusalén, Hebrón, Jarmut, Laquis jero Eglón yapatojeitantanaca oshequi manajeitachari. Ari ijajeitanaque isaviquimojeitapaaquero quempeji Gabaón, irimanajeitanteariri.
6Iotacojeitantacariri savicajeitatsiri nampitsiqui Gabaón, intsipaite itiancacantaqueneri irineane Josué, isavicajeitaquenta inampiqui Guilgal; icantiri: “Eiro piquisotanaquetsi pamitacojeitena. ¡Intsipaite pimpocajeite pimpiacoventajeitena! Yora maaroni pincatsaritatsiri amorreopee savicajeitatsiri toncaaripeequi yapatotimentajeitaquena irimanajeitena.” 7Irosati ijatantanaca Josué aisati maaroni manajeitachari neaperoyetachari, iponeajeitanaca inampiqui Guilgal. 8Ari icantiri Tasorentsi: “Eiro pitsaroacaajeitaritsi, noshinetaquempiri pintsoncajeiteri avinti, tecatsi piajeitavaquempine.”
9Iponeajeitantanacari inampiqui Guilgal, ijajeitaque. Tsiteniriqui imapocajeitaqueri imanajeitapaaqueri amorreopee. 10Ari icantashireacaajeitacari Tasorentsi, itsaroacaasanojeitantavacariri ishanincajeitaniri Israel. Imanajeitantacari savicayetatsiri nampitsiqui Gabaón, yoajeitaque oshequi catsini amorreopee. Impoiji yoijanajeitanaqueri shiajeivetanainchari avotsiqui jatantachari nampitsiqui Bet-horón. Aitaque yoaarantayetavajiriri pashini, irosati nampitsipeequi Azecá aisati Maquedá; 11Yora pashinipee oirincajeivetanainchari otapiitetapai Bet-horón, itiancaqueneri Tasorentsi antearoinapee iriniqui oquempeyetacaro mapipee oajeitapaaqueri, oshequi catsini camajeitaintsi, anaacotaqueri yoajeivetacari ishanincapeeni Israel.
12Ishinejeitantacariri Tasorentsi ishanincajeitaniri Israel itsoncajeitaqueri amorreopee, yora ishanincapee Josué iquemajeitaqueri icantiri Tasorentsi:
“Intimavaquetsita catsirincaiteri anta jenoqui nampitsiqui Gabaón,
aisati cashiri intimavaquetsita aisati jenoqui oirincaiteacotapai Aialón.”
13Yora catsirincaiteri aisati cashiri te irishevatajeaji,
irosati itsoncajeitantacari ishanincapeeni Israel quisajeitiriri.
Irotaque ocantiri Isanquenare Jaser. Yora catsirincaiteri iquisotapaaque nianqui inquite; irovetaincha omoncarateame aparo quitaiteri te inqueimateji. 14Oca imataqueri Tasorentsi, iquemisantaquero icantaqueriri atiri quemisantiriri, te irineimateroji peeraniniri quempetarori oca. Aisati tecatsi neimaterone coajicani; tempa Tasorentsi yamitacojeitaqueri ishanincajeitaniri Israel, imanacoventajeitaqueri.
15Ari ipiajeitaja Josué jeri manajeitachari carajeitanajiri anta inampiqui Guilgal. 16Yora pincatsaripee caratatsiri 5 ishiajeitanaca irinti imanapaaca omoroqui imperita anta nampitsiqui Maquedá. 17Impoiji ineetajiri, irosati icamantanteetajari Josué. 18Iquemantacari, irosati icantantacari aparopee ishaninca: “Pintivironque mapipee, pashitacotasanoteri aisati poanaque shentajeiterine. 19Avintiquea, eiro pisavicajeititsi aca; pijajeite poijanajeitanaqueri quisajeiteeri, pimanajeitantavaqueariri. Eiro pishinejeitiritsi irareejeitajea inampipeequi, tempa ishinetaqueeri yora Atasorentsite aquemisantajeitiri, antsoncajeitanteariri.”
20Itsoncantasanojeitacariri Josué aisati ishanincapee yora amorreopeeni, yoajeitaqueri oshequi catsini, yora itsipapee caari yoyeeti itsitejeitapaaja inampipeequi. 21Ari ipiajeitajaro manajeitachari nampitsiqui Maquedá, isavicaquenta Josué; tecatsi oaarantajeiterine irinti. Tecatsi materine incantimayeeteri ishanincapeeni Israel.
22Irosati icantantacari Josué: “Pintivironcajero mapipee, poimisotoyeri pincatsaripee caratatsiri 5.” 23Irosati itivironcantacaro, yoimisotoajeitaqueri pincatsariyetatsiri anta nampitsipeequi Jerusalén, Hebrón, Jarmut, Laquis jero Eglón. 24Ari yaajeitantacanariri Josué, icajemajeitaqueri maaroni manajeitachari. Icantiri yora jivatacaajeitiriri: “Caate, paaticatsanojeiteri pincatsaripeeca.” Ari yaaticajeitaqueri. 25Aisati icantaqueri: “Eiro pitsaroajeititsi aisati eiro picantashirejeititsi; irointi pishintsishirejeitanaque. Iriotaque Tasorentsi matacaajeiteerine amajeitanteariri quisajeiteeri.” 26Irosati yoantacari Josué, aisati itsatacantajeitaqueri aparopeeni inchatoqui irosati ishaaviniji. 27Ari irotimataintsi inqueaje catsirincaiteri, irosati yoaniireacantantajari, yoiminqueajiri aisati omoroqui imperita imanantavetapaacari. Impoiji yashitacotaqueri antero mapipee, irosati ocanta meeca otimi.
Imanajeitaquero otsipapee nampitsi
28Ari imanajeitaqueri iriori savicajeitatsiri nampitsiqui Maquedá, itsoncasanojeitaqueri maaroni, yoajeitaqueri. Tecatsi catsini timanajantsine aisati ivincatsarite, iquempetaqueri pincatsariventironiri Jericó.
29Itsoncajeitantanacariri, irosati yovaajeitantanaca nampitsi Libná, imanajeitapaaqueri iriori savicajeitatsiri. 30Ishinetaqueri Tasorentsi itsoncasanojeitantacariri maaroni, yoajeitaqueri. Tecatsi catsini timanajantsine aisati ivincatsarite, iquempetaqueri pincatsariventirorini Jericó. 31Itsoncajeitantanacariri savicajeitatsiniri nampitsi Libná, irosati yovaajeitantanaca nampitsi Laquis, ivancotimojeitapaacari quempeji, irimanajeitanteariri iriori savicajeitatsiri. 32Ari apitetanaque quitaiteri irosati imanajeitantacari. Ishinetaqueri Tasorentsi itsoncajeitantacariri yoajeitaqueri maaroni savicajeitatsiri nampitsiqui Laquis aisati ivirapeeni. Iquempejeitaqueri savicajeitatsiniri nampitsiqui Libna. 33Iquemacotantacariri Horam, pincatsariventirori onta nampitsiqui Guézer, irosati ipocantavetaca. Yamajeivetacari oshequi manajeitachari iramitacojeiterime. Iro cantaincha itsoncajeitavaqueri iriori Josué, tecatsi timanajantsine.
34Itsoncajeitantanacariri, irosati yovaajeitantanaca nampitsi Eglón, ivancotimojeitapaacari quempeji, irimanajeitanteariri savicajeitatsiri. 35Irosati quitaiteri yoantajeitacariri maaroni savicantajeitarorini nampitsiqui Eglón, itsoncasanojeitantaqueri catsini, iquempejeitaqueri savicajeitatsiniri Laquis.
36Iponeanajaro Eglón, irosati imanajeitapaaqueri iriori savicajeitatsiri nampitsiqui Hebrón. 37Itsoncasanojeitaqueri, yoaqueri ivincatsariteni jeri maaroni savicayetatsiri aisati maaroni ivirapeeni. Aisati iquempeyetanaquero pashinipee nampitsi tsipanampiyetaroniri, iquempejeitanaqueri savicajeitatsiniri Eglón.
38Itsoncajeitantanacariri, irosati iquenajeitantanacaro nampitsiqui Debir, imanajeitapaaqueri iriori savicajeitatsiri. 39Yoajeitapaaqueri iriori savicajeitatsiri aisati ivincatsariteni. Aisati iquempeyetanaquero nampitsipee tsipanampiyetaroniri, itsoncasanojeitanaqueri catsini. Tecatsi timanajantsine, iquempeyetanaqueri savicayetatsiniri nampitsipeequi Hebrón jero Libná, yoajeitanaqueri ivincatsaritepeeni.
40Aitaque icantajeitacari Josué imanajeitaqueri savicayetatsiri nampitsipeequi. Itsoncajeitaqueri pincatsaripeeni aisati manajeivetacharini carajeivetarini savicayetatsiniri toncaaripeequi, quipatsiqui Négueb, ovinteniiteayetapai jero oirincaiteayetapai. Itsoncasanojeitaqueri, yoajeitaqueri, tecatsi timanajantsine. Imoncarataquero icantaqueriri Tasorentsi yora iquemisantajeitiri ishanincajeitaniri Israel. 41-42Itsoncantacariri yoajeitaqueri pincatsariyetatsiniri aisati yaajeitaquero iipatsitepeeni, oponeanaca Cadés-barnea, Gaza, aisati Gosen irosati nampitsiqui Gabaón; tempa yamitacojeitaqueri Tasorentsi yora iquemisantiri ishanincajeitaniri Israel, imanacoventajeitaqueri. 43Irosati ipiatanaja Josué inampiqui Guilgal, icarajeitanajiri maaroni manajeitachari.
Currently Selected:
Josué 10: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
