Josué 9
9
Yamatavitaqueri savicantarori nampitsi Gabaón ishanincapeeni Israel
1-2Yora pincatsariyetatsiri hititapee, amorreopee, cananeopee, ferezeopee, heveopee jeri jebuseopee iquemacojeitantacarori avisaintsiri anta nampitsiqui Jericó; irosati yapatojeitantanaca maaroni irimanajeitantavaqueariri ishanincajeitaniri Israel. (Yora pincatsaripee isavicajeiti acaqueroca, otsapijapeequi nija Jordán iqueapinitinta catsirincaiteri, aisati toncaaripeequi aisati opampaiteyetapai jero aisati otsapijayetapaaque incajare Mediterráneo irosati otishiyetapai Líbano.) 3-5Irintiquea heveopee, savicajeitatsiri nampitsiqui Gabaón, iquemacojeitantacariri itsoncajeitaqueri savicajeitatsiniri nampitsipeequi Jericó aisati Ai, iquenqueshireajeitanaca; icanti: “Tsame amataviteri, eiroquea yoajeitantapeetsi arori.” Irosati itiancantajeitaca jatashitaqueriri Josué. Iquitsayetanaca tsereayetatsiri maatsarantsi aisati isapatotashiyetanacari peesati. Aisati yoanquetantashijeitanacari iraashinotepee peesato coshitaari jeri meshinantsi oaviyetachari yaacojatantanacari ovaja, aisati yaanontanaca tanta poayetanaintsiri. 6Yareetantajeitapaacarori Guilgal isavicajeitaquenta Josué jeri ishanincapee; icantajeitapaaqueri:
—Narovee ashaninca, noponeajeita areejiqui. Nocoi ancantavacaasanojeitea amoncarajeitero aacameetsatavacaajeitea.
7Ari yacanaqueri Josué jeri ishanincapee. Icantiri:
—Naamaaca piponeajeitaca quempeji, eiro nomajeitirotsi nomoncarajeitero acantavacaajeitacari.
8Icantajeitanajiri iriori:
—Queario, nocoi noncarajeitempi, nantaveejeitempi.
Ari isampitasanotaqueri iriori Josué:
¿Jaocampa pijijeitari? ¿Jaoca piponeasanojeitari?
9-10Yacajeitanaqueri iriori:
—Noponeajeitaca areejiqui. Iro nopocasanotantacari, noquemacotaqueri yora Pivincatsarite Tasorentsi, oshequi imatacaayetaquempi anta Egiptoqui. Aisati pitsoncajeitanaqueri apitetatsiri pincatsari amorreopee, yora Sihón, pincatsarivetironiri inampi Hesbón aisati Og, pincatsariventironiri inampi Basán, savicatsiniri Astarot antaqueronta nija Jordán. 11Irotaque itiancantaquenari jivatacaajeitanari aisati noshanincapee. Icantajeitana: ‘Nocoi pijajeite isavicajeitapaaquenta ishanincapeeni Israel. Paanontayetanaquea poajeitanaqueari nianqui. Pincantapeeri: Nocoajeitaque noncarajeitempi, nantaveejeitempi.’ 12Jero meeca oca tanta namanontayevetacari nopocantacari nocoajeitimpi. Iro cantaincha quisoyetanaque aisati poanaque. Namantacarori catsirincatatsi iroaquera otashitanaca. 13Aisati oquempetaca oca meshinantsipee namacojatantacari ovaja, tsereacoyetanaque. Namantacarori iroaquerapee onaveta. Aisati oquempeyetaca noitsaarepeeca jeri nosapatotepeeca, tsereayetanaque; tempa noponeaca areejiqui.
14Ineantacarori Josué jeri carayetiriri itantane, irosati ishirejeitantanacari. Iro cantaincha te inquenquetsatacayeriji Tasorentsi. 15Irosati icantasanotantacari Josué:
—Aitaque naacameetsajeitaquempi, eiro noajeitimpitsi. Yora Tasorentsi iquemajeitaquena nocantaquempiri aisati itsipapee jivatacantajeitatsiri.
Irosati ipiajeitantanaja. 16Ari avisanaque mava quitaiteri, irosati iquemantaca ishanincajeitaniri Israel, icanteetiri: “Irinti pocaitatsi savicatsiri nampitsiqui Gabaón, iriotaque pisaviquimojeitapaaqueri quempeji.” 17Irosati ijajeitantanaca irameneri, ocarataque mava quitaiteri yareetantacarori inampipee: Gabaón, Quefirá, Beerot jero Quiriat-jearim. 18Iro cantaincha te iroajeitaiteriji, tempa icantasanojeitavaqueri jivatacantajeitatsiri. “Aitaque aacameetsatavacaajeitaquea, eiro noajeitimpitsi. Iquemajeitaquena Tasorentsisanori, iriotaque Atasorentsite.”
Irotaque yora ishanincapee icantimajeitantanacariri yora jivatacaajeitiriri. 19Iro cantaincha icantanaqueri iriori:
—Queario, iquemajeitaquena Atasorentsite aquemisantajeitiri nocantasanojeitavaqueri: ‘Eiro noajeitimpitsi.’ Irotaque meeca eiro amajeitantaritsi amanajeiteri. 20Incanteata irisavicajeiteta, iquisajeiteecari Tasorentsi eirorica amoncaratirotsi acantasanojeitaqueriri.
21Ari icantasanojeiti jivatacantatsiripee: “Eiro avajeitiritsi. Irointiquea amperanajeiteari, aayeteeneri tsitsipee aisati aacojayeteeneri nija.” Aitaque ocantacari imoncarataquero icantasanotaqueri.
22Ari icajemacantaqueri iriori Josué savicajeitatsiri nampitsiqui Gabaón. Yareejeitantapaacari, icantavaqueri Josué:
—¡Paitaquea pamatavijeitantaquenari! Picantajeitaquena: ‘Noponeajeita areejiqui.’ Jaa, te pimponeimateaji, aiquetiji pisavicajeiti quempeji. 23Meeca eiro pisavicajeitajitsi cameetsa, pincanteani nomperanajeitempi. Pintsimatapinijeite aisati paacojatapinijeitena nija timatsineri Inantariqui Notasorentsite.
24Ari icantajeitanaqueri iriori:
—Iro namatavitantaquempiri, notsaroacaajeitaquempi poajeitena. Tempa noquemacotaqueri Pivincatsarite Tasorentsi piquemisantajeitiri icantasanotaqueri Moiseshini, quemisantiriri, impajeitempiro maaroni oca quipatsi aisati pintsoncajeiteri savicantajeivetarori. 25Jerocana meeca onimojeitaquena picantaquenari; ocameetsati nantajeitempiro paitarica pincoacaajeitenari.
26Iquemantacarori Josué icantaqueriri, te irishineteriji ishanincapee iroajeiteri. 27Irointiquea imperanajeiteari aayetenerine tsitsipee jero nijapee irashipee maaroni ishaninca aisati ashi altar intaantapiniteanariri ivirapee Tasorentsi jaocarica incoyeaque irinanteari. Irosati icantajeita meeca yantaveetiniri.
Currently Selected:
Josué 9: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
