Éxodo 9

Cincotatsiri oashinoncantsi: icamajeitaque virantsipee

1Ari icantajiri aisati Tasorentsi Moiseshi:

—Pijatashitajanteri aisati pincatsari, pincantapaajeri: ‘Aitaque icantiri Tasorentsisanori, yora ipincatsajeitiri noshanincapee: Pishinejeitajeri noshanincapee irijajeitajeta anta caaraiteriqui impincatsajeitantapaajenari. 2-3Eirorica pishinejeitajiritsi, irosatirica pintsaneajeiteari, irosati nontiancantajempiro pashini oashinoncantsi incamaarantayetanaque pivirapee: piyavayotepee, paashinotepee, piyameyotepee, pivacatepee jeri povishatepee. 4Irintiquea irashipee ishanincapeeni Israel, nonashitacaajeiteari; tecatsi catsini aparoni camayetatsine.’

5Aisati icantasanoti:

—Osaitequera nomatasanotero.

Ari ijatashitanaqueri Moiseshi pincatsari, icamantavetapaacari. 6Ari oquitaiteamanaji irosati itiancantacanari Tasorentsi oashinoncantsi; oamaarantitayetanaqueriri ivirapee. Irintiquea irashipee ishanincapee Israel, tecatsi camatsine aparoni. 7Ineantacariri pincatsari icamaarantayetaque, irosati itiancantaca amenerine irashipee ishanincapeeni Israel. Ineantapaacariri irosati icantajeita, tecatsi catsini camatsine. Iro cantaincha aiquero iquisoshiretasanotanajiri aisati, te irishineteriji irijajeitaje ishanincajeitaniri Israel.

Seistatsiri oashinoncantsi: isompojeitanaque egiptosatipee

8Irosati icantantajari Tasorentsi Moiseshi jeri Aarón:

—Pijatashitajanteri aisati pincatsari. Paavanejeitanaque samampo pojocavanetimotapeeri jenoqui. 9Osamampojencaiteanaquerota maaroni Egiptoni, irosati ompeantanaquea sompotsijenca oantachari. Ontsoncajeitapeerita maaroni savicajeitatsiri jeri iriori ivirapee timaarantayetanajantsiri.

10Ari yaavanejeitanaque samampo irosati ijatashitantajari pincatsari. Ari yojocavanetimotapaaqueri jenoqui. Irosati opeantanaca sompotsijenca, otsoncajeitapaaqueri maaroni atiripee jeri iriori ivirapee. 11Aisati oquempejeitapaaqueri iriori iotincaripee jeri sheripiaripee, irotaque caari imatantaja impiatavajeari Moiseshi. 12Iro cantaincha yora Tasorentsi icantacaashiretacari pincatsari iquisoshiretasanotantacari. Irotaque caari iquemisantantari Moiseshi jeri Aarón icantavetapaajari. Moncarataca icantaqueriri Tasorentsi: “Eiro iquemisantimpitsi.”

Sietetatsiri oashinoncantsi: opariaque iriniqui

13Ari icantajiri aisati Tasorentsi Moiseshi:

—Pintinaitamanempa capichaji quitaite, pijatashitajeri aisati pincatsari, pincantapaajeri: ‘Aitaque icantaqueri Tasorentsisanori, yora ipincatsajeitiri noshanincapee: Pishinejeitajeri noshanincapee irijajeitajeta caaraiteriqui impincatsajeitantapaajenari. 14Eirorica pishinejeitajiritsi, irosati nontiancajeitantempiro pashini oashinoncantsi. Irotaque piojeitanteari queario narotaque Tasorentsisanori mayetirori maaroni, tecatsi quempetenane aca quipatsiquica. 15Ariorica nonintaqueme, nonijayempirome notasorenca nontiaquempirome aparoni oashinoncantsi, noasanquetayempime avirori aisati pishanincapee. Aitaque nompoyereajeitaquempime maaroni. 16Iro cantaincha noshinetaquempi panee, pineantearori notasorenca aisati iriotantenari savicajeitatsiri maaroni quipatsipeequi. 17Pineajeivetacaro oca, iro cantaincha aiquero pitsaneajeitanacariri yora noshanincapee; te pincoyeji pishinejeitajeri irijajeitaje. 18Meecaquea osaitequerani onquempetamanempa, nontianquempiro antearoinapee iriniqui, caari piquemacotapiniti peerani quempetearone pariatsineri. 19Ocameetsati pincantajeiteri amenajeitimpiriri pivacatepee iroiminqueajeitempirita, piquempoyeapinijeitantaririqui. Ariorica ompariaque iriniqui, oajeitapaaqueri atiripee aisati ivirapee caari quempoyeajeitacha ivancopeequi.’

20Timatsi aparopeeni amitacoyetiriri iquemajeitavaquero ora icantapaaqueriri, oshequi itsaroasanojeitanaque. Irosati icantantayetacari inampirepee inqueayetanaqueta ivancoqui aisati yominqueacantayetaqueri ivirapee. 21Iro cantaincha ainiro itsipapee caari quemisantavaquerone; te iroiminqueayeteriji irinti atiripee aisati ivirapee. 22Irosati icantantajari Tasorentsi Moiseshi:

—Poanquero paco ompariayetantanaqueari iriniqui anta Egiptoqui, ontsoteantayetapemparori maaroni atiripee jeri ivirapee aisati iroori panquirentsipee.

23-24Ari yoancanaquero jenoqui, irosati itiancantacaro Tasorentsi antearojenca otireatireatanaque aisati omanamanatanaca. Irosati opariantayetanaca antearoinapee iriniqui. Antearoite catsini opariaque iriniqui aisati otireatireatanaca, te oncaratanajeji; otsoteanaquero maaroni Egiptoni. Tecatsi catsini quemacotapiniterone oca antearoinapee iriniqui te ompariapiniteni Egiptoqui. 25Ari oayetapaaqueri maaroni atiripee aisati ivirapee caari queayetanaintsi. Aisati oquempejeitapaaquero shiocayetatsiniri oantsipeequi aisati ocaaracompiyetanaquero inchatopee. 26Ari opariasanovetaca catsini. Iro cantaincha anta quipatsiqui Gosen, isavicajeitinta ishanincapeeni Israel, te catsini ompariimateji.

27Ineantacarori oca pincatsari, irosati icajemacantantanajari Moiseshi jeri Aarón. Yareetantapaacari, icantavajiri:

—Niotacotasanotaca ainiro nantane. Narotaque cantacaacarori aisati iriori noshanincapee; irintiquea Tasorentsi yantayetiro cameetsayetatsiri. 28Oshequi aneajeitaquero antearo omanamanataca aisati oparianaque iriniqui. Meecaquea eiro notsaneajeitajaritsi pishanincapee. Nocoi meeca pincantacoventajeitajena Tasorentsiqui. Irosati noshinejeitantajempi irijajeitaje.

29Ari icantanaqueri iriori:

—Jee. Meeca ariorica noshitoanaje aca, irosati noancantapaajearo naco, nonquenquetsatacaajeri Tasorentsi. Irosati ompeantanajea iriniqui aisati eiro aneavajirotsi otireatireatini. Irotaque piojeitanteari iriotaque Pincatsariventajeitirori maaroni quipatsi. 30Iro cantaincha niotasanotaquempi jeri amitacoyetimpiri, te pimpincatsajeiteriji Tasorentsi. 31Maaroni ipanquiyeetiniri egiptosati: ora lino teaquiyevetajachari jero cebada iroaquera omotiyevetaja, otsoncanaca maaroni otsinacapetaatanaca. 32Irointiquea ora tirico jero centeno itsacayetajiri, tecatsi oyerone, tempa tequerata oshiocayeteta.

33Isotoantanajari Moiseshi inampiqui pincatsari, irosati yoancantajaro iraco, iquenquetsatacaajiri Tasorentsi. Irosati opeantanaja shintsini opariini iriniqui aisati te aneajeroji omanamanatani. 34Iro cantaincha ineantavetajarori pincatsari opeanaja, yapiitajiro yantajiro caari cameetsatatsi. Te apaniro inquisoshirete aisati iriori amitacojeitiriri 35Yora pincatsari iquisoshiretanaji te irishinetajeri irijajeitaje ishanincapee Israel. Moncarataca icantitacariri Tasorentsi Moiseshi: “Eiro iquemisantimpitsi.”

Currently Selected:

Éxodo 9: cni

Highlight

Copy

Compare