Éxodo 8

Apitetatsiri oashinoncantsi: yoshequianaque masheropee

1Irosati icantantajari Moiseshi:

—Meeca pijatashitajanteri aisati pincatsari, pincantapaajeri: ‘Icantaji aisati Tasorentsi: Pishinejeitajenari noshanincapee irijajeitajeta anta caaraiteriqui, impincatsajeitantapaajenari. 2Eirorica pishinejeitajiritsi, irosati noashinoncaimentasanojeitantempiri. Nontiancajeitempiri masheropee intsoteanaquero maaroni Egiptoni. 3Aisati inquempetanaquero nija Nilo, irijaasanotanaquearo catsini. Inqueayetanaque pivincatsarimentoqui, pimaamentoqui, maaroni ivancopeequi amitacoyetimpiri jeri saviquimoyetimpiri. Aisati inqueayetanaque pivetsicacantapinitantaroriqui pitantanepee. 4Yora masheropee impatacayetanaquempi maaroni pitsempequipeequi, aisati iriori amitacojeitimpiri jeri maaroni atiripee.’

5Ari cantajiri:

—Pincanteri pirenti iroanquerota irinchaquiire. Irijicoyetantearota nijatenipee, osantenipee jero incajarepee, irishitoantanaqueari oshequi catsini masheropee, intsoteantanaquearori maaroni Egiptoni.

6Irosati yoancantanacaro Aarón irinchaquiire, ijicoyetantanacaro nijapee. Irosati yoshequiasanojeitantanaca catsini masheropee. 7Ari icajemacantanajiri iriori iotashiyevetarori paitapeerica jeri sheripiaripee. Aisati iquempejeitapaaqueri iriori yoshequiajeitapaaqueri masheropee. Irosati ipiantanaja Moiseshi jeri Aarón. 8Icantani yashereapinijeitaqueri masheropee pincatsari. Irosati icajemacantantajari Moiseshi jeri Aarón. Yareetantapaajari, icantavaqueri:

—Meeca pincantajeri Pitasorentsite impeajeitajerita masheropee. Ariorica impeajeitanajea, irosati noshinejeitantajempi paajeitanajeri pishanincapee, pintaantayetapaajeanariri Pitasorentsite virantsi.

9Ari icantanaqueri iriori:

—Pincantena meeca jaoca oncarate picoi noncantacoventajempi Tasorentsiqui aisati amitacojeitimpiri jeri pishanincapee, impeajeitantajeari masheropee eiro itimantanajatsi pivincatsarimentoqui. Aintiquea intimajeitanaje nijaqui.

10Ari icantanaqueri pincatsari iriori:

—Nocoaque osaitequera pincantacoventajena.

Irosati icantantanajari iriori Moiseshi:

—Jee, aitaque oncanteari picantaquenari, piotanteari tecatsi pashini quempetearine Novincatsarite Tasorentsi. 11Aitaque impeajeitanajea masheropee pivincatsarimentoqui, tecatsi ashereanajeitanajempine, aintiquea intimanaje nijaqui.

12Irosati isoquijantanaja Moiseshi jeri Aarón, ijatanaji inampiqui. Irosati icantantajari Tasorentsi impeajeitajeri masheropee. 13Irosati icamajeitantanaja. Iro cantaincha ishitijencatasanotanaque catsini, itsoteanaquero Egiptoni. 14Yora atiripee yapatojeitajiri, ipioyetaqueri. 15Iro cantaincha yora pincatsari ineantajari itecatsitacojeitanaji, irosati iquisoshiretantanaja aisati. Te incoanaje irishinejeitajeneri ishanincapee iraajeitanajeri. Aisati te inquemisanteroji icantavetapaajariri Moiseshi jeri Aarón. Moncarataca icantaqueriri Tasorentsi: “Eiro iquemisantimpitsi.”

Mavatatsiri oashinoncantsi: ishequianaque shineequipee

16Ari icantajiri aisati Tasorentsi Moiseshi:

—Pincantajeri Aarón irijicotero irinchaquiire impasatero quipatsi osamampojencatanaqueta, ompeantanaqueari shineequi, intsoteajeitantapemparori Egiptoni.

17Aitaque icantaquerori. Irosati ijicotantanajaro Aarón irinchaquiire ipasataquero quipatsi. Irosati opeantanaca shineequi yoajeitapaaqueri atiripee aisati ivirapee. 18Yora iotincaripee jeri sheripiaripee, icoajeivetanaja irishequiajeitantajearime shineequipee ishiacaaveementopeequi. Iro cantaincha te irimajeitajeroji. Aiquero yoshequiasanotanaitii catsini shineequipee, yashereajeitanaqueri atiripee aisati ivirapee. 19Irosati icantantajeitacari pincatsari:

—Iriotaque Tasorentsi mataquerori oca.

Iro cantaincha te inquemisanteriji icantavetacariri, aiquero iquisoshiretanajiri. Moncarataca icantaqueriri Tasorentsi Moiseshi: “Eiro iquemisantimpitsi.”

Cuatrotatsiri oashinoncantsi: yoshequianaque shimpoquipee

20Irosati icantantajari Tasorentsi Moiseshi:

—Pintinaitamanempa capichaji quitaite, pijatamane nijaqui poyeamaneri pincatsari; aitaque impocamaneri. Pincantantavajeariri: ‘Icantaji aisati Tasorentsi: Pishinejeitajeri noshanincapee irijajeitajeta impincatsatantapaajenari. 21Eirorica pishinejeitajiritsi, irosati nontiancajeitantempiri shimpoquipee oshequi catsini. Intsoteapaaquero ivancopeequi egiptosati aisati pivincatsarimentoqui, irosati maaroni quipatsiqui. 22Ariorica avishimojeitaquempi oca, nonashitacayemparo quipatsi Gosen isavicajeitinta noshanincapee, eiro catsini aneimatiritsi aparoni shimpoqui. Irotaque piotanteari narotaque Tasorentsi pincatsariventantatsiri aca Egiptoqui. 23Nonashitacaajeitacari noshanincatacari aisati pishanincapee avirori. Osaitequerani pineajeitavaqueri nontiancajeitempiri.’

24Aitaque icantaquerori Tasorentsi, itiancaqueri oshequi catsini shimpoquipee iquempevetapaacaro tsitenishaatsiri mencori. Iqueayetapaaquero maaroni pancotsipee aisati ivincatsarimentoqui pincatsari jero ivancopee iriori amitacoyetiriri. Itsoncajeitapaaquero maaroni quipatsi Egiptoni.

25Irosati icajemacantantajari pincatsari Moiseshi jeri Aarón. Yareetantapaajariri, icantavajiri:

—Pijate meeca, pintaajeiteneri Pitasorentsite pivira. Iro cantaincha eiro pijatitsi anta, aitaque meeca aca pintaajeiteneriri.

26Ari icantanajiri Moiseshi:

—Te onimotenaji nontaimojeitempiri aca, tempa yora virantsi notainiriri Tasorentsisanori Notasorentsite, iriotaque ipincatsatiri pishanincapee inashitacaari. Ariorica irineacojeitaquenari nontayeneriri Tasorentsi, aitaque iroimentajeitaquenari impicheimentajeitaquenari. 27Aintiquea ocameetsati nojajeite anta caaraiteriqui, oncarate mava quitaiteri naniijeitanaque nareejeitantearori. Aitaque nontaajeitapeneriri Tasorentsisanori Notasorentsite virantsi. Tempa aitaque icantasanotaquenari.

28Irosati icantantanajari aisati pincatsari:

—Jee, cameetsataque, pijate pintaantapempanariri virantsi picantiri Tasorentsisanori Pitasorentsite, iro cantaincha eiro pijatasanotitsi areejiqui. Pincantacoventajenayea narori impeantanajeari shimpoquipee.

29Ari icantanajiri iriori Moiseshi:

—Ariorica meeca noshitoanaje aca, irosati noncantantajeari Tasorentsi iroimpeajeitajeri shimpoquipee. Iro cantaincha meeca noncantasanotempi: ‘Eiroyea papiitajirotsi pamatavitajena aisati eiro pitsaneapitsajeitajanaritsi noshanincapee naajeitanajerita nontaajeitapeneri Notasorentsite virantsi.’

30-31Ishitoantanajari Moiseshi ivincatsarimentoqui pincatsari, irosati iquenquetsatacantacari Tasorentsi. Irosati imatantajaro Tasorentsi icoacotaqueriri Moiseshi, ipeajeitanaja shimpoquipee; tecatsi timanajantsine catsini inampiqui. 32Iro cantaincha ineantajari pincatsari itecatsitacojeitanaji, aiquero iquisoshiretanajiri aisati. Te incoyeji irishinejeitajeri ishanincajeitaniri Israel irijajeitantajeari.

Currently Selected:

Éxodo 8: cni

Highlight

Copy

Compare