Daut Leet 6
6
De Mejales
1Wua es dien Schauz hanjegonen,
du schmokste von aule Mejales?
Saj, waut wull dien scheensta dan nu,
daut wie halpen kjennen am nu to finjen?
See
2Mien scheensta jinkj rauf en sien Goaden,
sikj to weiden em Beet von Jewerz,
un de Lelje bewundren un nämen.
3Ekj jehia mienem scheensten,
un hee jehieet mie;
hee erjazt sikj aun de Lelje.
Daut fefte Leet
Hee
4Mien Schauz,
die lat et soo schmock aus de Staut Tirza;
du best mie soo scheen aus Jerusalem, Schauz;
ekj stutz ver die aus ver een Häa.
5Kjikj nich no mie;
diene Uagen beteiben mie gaunz.
Soo aus Kosen von Gilead streemen,
soo henjen de Hoa von dien Kopp.
6Diene Tänen, dee stonen aus Schop,
dee nom schäaren un wauschen oppkomen;
jieda eene haft twee bie sikj stonen,
un kjeene fält daut noch aun dee.
7Diene Baken sent Baken von Apel,
dee hinja dien Schleia väaschienen.
8Doa sent soo bie 60 Kjennijinnen,
met 80 Näbenfrues,
un Mejales dee nich gonen to talen.
9Oba eene es miene, mien Dufkje;
see es aules waut ekj mie bloos wensch.
See es eene, dee äare Mutta sikj wält;
bie de Mutta es see huach aunjeschräwen.
Aus de Mejales ar sagen, säden see:
Aule Mejales veieren ar huach,
un däm Kjennich siene Frues lowen ar.
10Wäa es dit, dee väakjemt aus Morjenroot,
soo schmock aus de Mon,
soo rein aus de Strolen vonne Sonn?
Ekj stutz ver die aus ver een Häa.
11Ekj jinkj rauf no dän Nät Goaden kjikjen,
auf de Bloomen em Tol aul opjinjen,
auf de Wien Ranken Asta utleeten,
un woo sea Granat Apel blieejden.
12Ekj vesto nich woo sikj mien velangen
mie biem Leida von mien Volkj haft jesat.
Currently Selected:
Daut Leet 6: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
