Daut Leet 5
5
Hee
1Ekj sie en mien Goaden jekomen,
miene Brut un mien Schauz;
un ekj läs doa Jewerz un uk Mirren,
ekj schmakj mienen Honnich un Sauft,
un ekj drinkj mienen Wien, miene Malkj.
De Mejales
Lot et scheen schmakjen, Dufkjes,
nämt soo väl aus jie wellen.
Daut vieede Leet
See
2Ekj schleep, doch em Hoat wia ekj waka.
Horch doch, daut klopt wua! Mien Schauz!
Hee
Moak op miene scheenste, mien Schauz;
miene Duw, ekj hool aules von die.
Mien Kopp es gaunz naut von däm Deiw,
un de Hoa von däm Sodda enne Nacht.
See
3Ekj hab mie sest aul aufjetrocken,
sull ekj mie noch wada auntrakjen?
Ekj hab miene Feet aul jewoschen,
sull ekj dee noch wada enschwienen?
4Mien Schauz siene Haunt foot no de Kjlinkj,
un mie reet daut von bennen no am.
5Ekj muak mie reed toom am nenloten,
miene Haunt wia gaunz naut von Parfum;
mie kjlakjad de Haunt von de Mirren,
aus ekj no de Kjlinkj foten deed.
6Aus ekj op muak fa am, mienen Schauz,
wia hee wajch. Ekj must stoawen, docht ekj.
Siene Stemm haud mie gaunz metjeräten,
un ekj socht un ekj socht, doch vejäfs;
un ekj roopt, doch hee wia nich to hieren.
7Dan fungen mie Wajchta, aus see
enne Staut oppe Gaussen romjinjen.
Dee schluagen un kjielden mie Wund;
un see neemen mien Mauntel von mie,
dise Wajchta oppe Mia von de Staut.
8Oba Mejales von Jerusalem,
wan jie mienen Frint noch wua seenen,
waut sell jie am sajen? Sajcht am:
Ekj sie schlaup, wäajen waut ekj mie wensch.
De Frind
9Saj, woo es doch dien Schauz soo väl bäta,
du schmokste von aule Mejales?
Saj, woo es dan dien Schauz soo väl bäta,
daut du ons Vespräakjen west haben?
See
10Mien Schauz es jesunt un uk rodlich;
hee es de basta mank 10.000 Mana.
11Sien Kopp es daut scheenste, aus Golt,
siene Hoa sent dan krus
un soo schwoat aus ne Krauj.
12Siene Uagen sent aus Duwen bie ne Kjwal,
witte Duwen bie een kloara Kanol.
13Siene Baken, dee rikjen,
aus een Beet met Jewerz;
hee haft Leppen aus Lelje,
von Mirren jenat.
14Siene Oarms sent Walen von Golt,
wuarut Turkis Steen schienen;
un sien Kjarpa es woaret Aulfenbeen,
besonda jewoakjt met Safieren doabennen.
15Siene Been sent aus Stendasch von Marmor,
en waut Golt nenjeplaunt.
Am lat daut soo schmock aus dän Libanon,
soo butajeweenlich aus Zeeda.
16Sien Mul es soo seet,
ekj bang mie no aules aun am.
Mejales von Jerusalem
soo scheen es mien scheensta,
soon Schauz es mien Schauzkje.
Currently Selected:
Daut Leet 5: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
