Psalmen 96
96
Gott, de Kjennich von de gaunze Ieed
(1Chr 16,23-33)
1Sinjt däm Harn een nieet Leet väa; sinjt fa dän Harn, de gaunze Welt. #Psa 33,3 2Sinjt fa dän Harn un loft sienen Nomen. Rät aule Dach von woo hee raden deit. 3Vetalt aule Velkja von siene Harlichkjeit un von siene Wundawoakjen. 4Wiels de Har es groot un lowenswieet. Hee sull mea jefercht woaren aus aule Jetta. 5Wiels de Velkja äare Jetta sent aules Aufjetta, oba de Har haft dän Himmel jemoakt. 6Pracht un Harlichkjeit sent ver am; Krauft uk Scheenheit fellen sien Heilichtum.
7Jie Menschenkjinja ut aule Velkja, schrieft dän Harn Iea un Jewault too. 8Schrieft dän Harn de Harlichkjeit too, dee sienen Nomen traft. Komt met Opfa en sienen Väahoff. 9Doot dän heiljen Harn en aule Scheenheit aunbäden. De gaunze Welt, fercht dän Harn. 10Sajcht to aule Velkja, daut de Har Kjennich es, un daut de Welt, dee hee jeschaufen haft, fauststonen deit, un daut hee de Velkja rajcht rechten woat. #Psa 93,1
11Lot dän Himmel sikj freien un de Ieed froo sennen; lot daut Mäa ruzhen met aules waut doabennen es. #(11-13) Psa 98,7-9; Jes 49,13 12Lot de Stapen un waut doabowen es sikj freien. Dan woaren aule Beem en de Welda met Freiden juchen. 13Dee woaren ver däm Harn sinjen, wiels hee kjemt, hee kjemt de Ieed to rechten. Hee woat de Welt jerajcht rechten, un de Velkja, soo aus hee daut rajcht sitt. #Psa 82,8; Apost 17,31
Currently Selected:
Psalmen 96: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
