Psalmen 91

Gott beschizt

1Wäa bie dän Aulahechsten em Schulinj wont, woat sikj bie dän Aulmajchtjen em Schauten vereiwen. 2Dee woat toom Harn sajen: Du best miene Tooflucht un miene vesechade Staut, mien Gott opp dän ekj mie velot.

3Hee woat die secha ut dän Jäaja siene Schlenj rutraden un uk ut de jefäadelje Pestilenz. 4Hee woat sikj die unja de Flichten nämen, un doarunja woascht du emma secha sennen. Daut hee soo tru es, es aus een Schorm un Schilt. 5Du woascht nich Angst haben, daut de Nacht waut schrakjeljet passieren woat, ooda fa de Feilen, dee äwadach flieejen, 6uk nich fa de Pestilenz, dee sikj em Diestren romschlikjt, ooda fa de Ploagen, dee medden em Dach ombrinjen. 7Wan bie die uk 1.000 aun eene Sied faulen un 10.000 aun de rajchte Sied, oba daut saul die nich dicht bie komen. 8Du woascht bloos kjikjen un met diene Uagen seenen, woo de gottloose jestroft woaren.

9Wiels du die dän Harn, dän Aulahechsten, aus Woninj jewält hast, 10woat äwa die kjeen Schoden komen, un bie diene Woninj woat kjeene Ploag dicht bie komen. 11Wiels hee haft siene Enjel jesajcht äwa die to sennen, un die opp aul diene Wäaj to bewoaren. #(11 un 12) Mat 4,6 12Dee woaren die opp de Henj droagen, daut du die de Feet nich aun de Steena statst. 13Du woascht opp däm Leiw un opp de Schlang stieen kjennen, un opp junge Leiws un Droaken met de Feet romklunjen. #Luk 10,19

14Wiels hee mie goot es, sajcht de Har, woa ekj am uthalpen. Wiels hee mienen Nomen kjant, woa ekj am bewoaren. 15Hee woat mie aunroopen un ekj woa am auntwuaten. Ekj woa am em Trubbel biestonen; ekj woa am raden un to Ieren brinjen. #Psa 50,15 16Ekj woa am met een langet Läwen tofräd stalen, un am miene Radunk seenen loten. #Jes 52,10

Currently Selected:

Psalmen 91: PB

Highlight

Compare

Copy