Psalmen 89

Troost fa David sien Hus

1Unjarecht von Etan, dän Esrachita. 2Har, ekj well eewich von diene truhoatje Leew sinjen, un ekj woa emma un emma doavon räden, woo tru du best. 3Ekj behaupt, daut diene truhoatje Leew eewich faust steit un daut eena sikj soo secha opp die veloten kaun aus opp dän Himmel selfst. 4Du sätst: Ekj hab met mien jewälden een Bunt jemoakt; ekj hab mienen Deena David jeschwuaren, #Psa 132,11; Jes 55,3 5daut von siene Nokomen emma wäa bliewen woat, un daut sien Troon von derch aule Jennerazionen bestonen woat. #2Sam 7,16; Apost 2,30 6De Himmel woaren diene Wunda lowen, oo Har, un sajen woo tru du en de heilje äare Vesaumlunk best.

7Wiels wäa es en de Wolkjen met dän Harn to vejlikjen? Un wäa en aule Himmelswelten es soo aus ons Har? #1Kjen 22,19 8Gott woat en de heilje äare Vesaumlunk jefercht un mott en Ieaforcht jehoolen woaren von aul dee, dee om am sent. 9Oo Aulmajchtja Gott un Har, wäa es soo aus du? Du best majchtich, oo Har, un opp die es gaunz un goa to veloten. 10Du rejieescht äwa daut orruje Mäa; du stelst de Walen wan dee sikj häwen. #Psa 65,8; Mat 8,26 11Du hast Rahab en Bieta jebroaken, soo aus een Dooden, un vestreist diene Fiend met dienen stoakjen Oarm. #Hiob 9,13; 26,12; Jes 30,7; 51,9 12Himmel un Ieed sent diene! Du hast dän Grunt jelajcht fa dän Ieedboddem un waut doabennen es. #Psa 24,1 13Du hast dän Nuaden uk dän Sieden jeschaufen. De Boaj Tabor un Hermon sinjen froo en dienen Nomen. 14Du hast eenen jewaultjen Oarm! Stoakj es diene rajchte Haunt; dee es huach oppjehowen. 15Du rejieescht jerajcht un opprechtich; daut es emma to seenen woo leeftolich un tru du best.

16Jesäajent es daut Volkj daut doa jubelieren kaun; dee woaren ver die en dien Licht waundlen. 17Dee woaren sikj aule Dach to dienen Nomen freien un en diene Jerajchtichkjeit jeieet sennen. 18Du moakst ons harlich un jefst ons Krauft; en diene Jnod jefst du ons Krauft, jäajen onse Fiend to stonen. 19Ons Schilt jehieet däm Harn, ons Kjennich jehieet däm, dee en Israel heilich es.

20Du rädsd emol derch eene Openboarunk to diene Heilje un sätst: Ekj hab een Helt oppjewakjt. Ekj hab eenem utem Volkj jewält un huach väajehowen. #(20 un 21) 1Sam 13,14; 16,13 21Ekj hab mienen Deena David jefungen, un hab am met miene heilje Eelj aus Kjennich jesaulft. 22Miene Haunt saul am unjastetten; derch mienen Oarm woat hee stoakj sennen. 23Jäajen am woat kjeen Fient stonen kjennen; kjeen ojjerajchta woat am unjadrekjen. 24Ekj woa siene Jäajna ver am en de Grunt schlonen, un dee ploagen, dee am nich lieden kjennen. 25Mien toovetruen un truhoatje Leew sellen met am sennen, un mien Nomen woat am stoakj jenuach moaken jäajen siene Fiend to stonen. 26Ekj woa siene Haunt äwa daut Mäa stalen, un siene rajchte Haunt äwa de Riefasch. #Psa 72,8 27Hee woat soo to mie sajen: Du best mien Voda, mien Gott, un mien Schutz wua ekj secha sie. #(27 un 28) 2Sam 7,14 28Ekj woa am uk mienen Ieeschtjebuarnen nanen, dee mank aule Kjennichs oppe Ieed daut hechste steit. 29Miene truhoatje Leew fa am saul eewich bliewen, un mien Bunt met am saul emma stonen. 30Siene Famielje saul niemols utstoawen un siene Harschoft woat bliewen soolang aus de Himmel steit. 31Wan oba siene Kjinja sikj nich aun mien Jesaz hoolen, un nich en miene Wäaj waundlen, 32wan dee miene Ordnungen entheiljen, un miene Jebooten nich hoolen, 33dan woa ekj an fa äare Sinden un Gottloosichkjeit utem Grunt strofen, aus met däm Stock ooda eene Pitsch. 34Oba miene truhoatje Leew woa ekj nich von am trigjtrakjen, un ekj woa uk niemols ontru woaren. 35Ekj woa mienen Bunt nich bräakjen, uk nich endren, waut äwa miene Leppen jekomen es. 36Dit hab ekj eemol fa emma bie mienen heiljen Nomen jeschwuaren, un ekj wudd David nich väalieejen. 37Doa woat emma wäa von siene Lienje bliewen, un siene Harschoft woat ver mie bestonen soo aus de Sonn. #Psa 72,17 38Dee saul eewich stonen soo aus de Mon; dee saul fauststonen soolang aus de Himmel steit. #1Mo 9,13

39Oba du best äwa dienen jesaulften Kjennich sea doll jewast; du hast am vestat un veschmäten. 40Du hast dän Bunt met dienen Kjnajcht trigjenomen; du hast siene Kroon em Drakj jeschmäten un doaderch veonieet. 41Du best derch aul siene Wenj jebroaken un hast aul siene vesechade Städa vedorwen. 42Aul dee waut doa vebie gonen, bestälen am; hee es fa siene Nobasch een Spott jeworden. 43Du hast siene Jäajna de rajchte Haunt huachjehowen; du moakst siene Fiend froo! 44Du hast am uk de Krauft em Schwieet wajch jenomen, un hast am em Kjrich nich biejestonen. 45Du hast met siene Pracht een Enj jemoakt, un siene Kroon opp de Ieed jeschmäten. 46Du hast siene Jugentjoaren vekjartat, un hast am met Schaund bedakjt.

47Woo lang, oo Har? West du die opp emma vestäakjen? Woo lang woat dien Oaja brennen? 48Denkj doaraun, woo kort mien Läwen es; hast du aule Menschen fa nuscht jeschaufen? 49Doa läft kjeena, dee nich stoawen mott, dee siene Seel ut dän Doot siene Haunt raden kaun.

50Oo Har, wua es diene väaje truhoatje Leew jebläwen, dee du, opp däm wie ons veloten kjennen, David vesproaken hast? 51Denkj doaraun, Har, woo dien Kjnajcht es vespott worden, un woo ekj dän Spott von aule Velkja en mien Hoat droag; #Psa 44,10-25 52dän Spott wuamet diene Fiend, oo Har, jieda Schrett jespott haben, dän dien jesaulften Kjnajcht jegonen es.

53De Har saul opp emma jeloft woaren! Amen un Amen. #Psa 41,14

Currently Selected:

Psalmen 89: PB

Highlight

Compare

Copy