Psalmen 88
88
Daut Jebäd wan veloten un en Doodesjefoa
1Een Psalmleet von Korach siene Säns, väatosinjen, no de Wies: De schwake em Älent. Unjarecht von Heman, dän Esrachita. #1Chr 6,18 2Oo Har Gott, mien Heilant, ekj schrie Dach un Nacht ver die. 3Lot mien Jebäd ver die komen un horch wan ekj schrie. 4Wiels met miene Seel es daut jaumalich un ekj hab dän Doot ver de Uagen. 5Ekj woa aunjeseenen aus eena, dee reed es fa daut Grauf. Ekj sie aus een Maun, dee kjeene Krauft haft. 6Ekj woa aul manke Doodje jetalt, dee soo aus de jeschloagne en de Jräwa ligjen, aun dee du nich mea denkjst; diene Help es fa an aufjeschnäden. 7Du hast mie en een deepet diestret Grauf jelajcht. 8Dien Oaja licht schwoa opp mie; diene Walen sent von aule Sieden äwa mie jerolt.
9Du hast daut soo wiet jebrocht daut miene baste Frind mie veloten, un daut ekj an wadalich sie. Ekj ligj enjeschloten un kaun nich rut. #Psa 38,12 10Miene Uagen sent derch aul mien Trua schwak jeworden. Har, ekj schrie aule Dach no Help. Ekj sto ver die met utjestrakjte Henj. 11Latst du de Doodje diene Wunda seenen? Ooda woaren de Doodje oppstonen un die danken? #(11 un 12) Psa 6,6; Jes 38,18 12Woat em Grauf von diene truhoatje Leew jerät woaren? Es daut em Grauf to seenen, woo tru du best? 13Kjennen diene Wunda em diestren jeseenen woaren, ooda diene Jerajchtichkjeit en een Launt, wua aules vejäten es?
14Ekj oba schrie om Help, oo Har! Zemorjes kjemt mien Jebäd ver die. 15Har, wuarom statst du mie trigj un latst die nich von mie seenen? 16Ekj hab von junk opp en Angst un Älent jeläft, un sie dicht biem Doot jewast; ekj lied unja diene Schrakjen un sie schia vezoacht. 17Dien wutja Oaja es äwa mie jekomen. Diene Schrakjen haben mie en de Grunt jebrocht. 18Dee sent aule Dach om mie soo aus een Huachwota; dee haben mie runtom en äare Jewault. 19Du hast mie miene Kommaroden un miene Frind wajch jenomen, daut diestre es nu mien eensja Frint.
Currently Selected:
Psalmen 88: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
