Psalmen 86

Een Roop no Help en groote Noot

1David sien Jebäd. Har, horch no mie un jeff mie eene Auntwuat, wiels ekj sie oam un em Älent. 2Bewoa miene Seel, wiels ekj jehia die! Mien Gott, halp dienen Deena, dee sikj opp die velat. 3Har, lot diene Jnod äwa mie komen, wiels ekj kom aule Dach ver die em Jebäd. 4Moak dienen Deena de Seel froo; mien velangen, oo Har, es no die! 5Wiels du, Har, best goot un reed to vejäwen, un hast eene truhoatje Leew fa aul dee, dee die aunroopen. 6Hia mien Jebäd, oo Har! Horch woo ekj om Jnod schrie! 7Wan ekj en Trubbel kom, woa ekj die aunroopen, wiels ekj weet du woascht mie auntwuaten. #Psa 50,15

8Har, mank aule Jetta es kjeena soo aus du; kjeena kaun daut doonen waut du deist. #2Mo 15,11; Psa 135,5 9Aule Velkja, dee du jeschaufen hast, oo Har, woaren ver die komen un die aunbäden; dee woaren dienen Nomen ieren. 10Wiels du best een groota Gott un deist Wundawoakjen un best de eensja Gott.

11Wies mie dienen Wajch, oo Har, un ekj woa en diene Woarheit waundlen. Hool mien Hoat bie daut eene, daut ekj dienen Nomen ferchten woa. #Joh 14,6

12Ekj woa die, oo Har mien Gott, von gaunzem Hoaten lowen, un eewich dienen Nomen veharlichen. 13Wiels diene truhoatje Leew fa mie es sea groot; du hast miene Seel vom Doot jerat.

14Gott, de stolte sent jäajen mie oppjestonen, un eene jewaultje Baund steit mie nom Läwen, Menschen dee nich met die räakjnen. 15Du oba, Har Gott, best voll Jnod un Metleet, du best jeduldich, truhoatich un leeftolich. #2Mo 34,6; Psa 103,8 16Oo nemm mie en Jnoden aun. Jeff dienen Deena diene Krauft un rad diene Deenarin äaren Sän! 17Jeff mie een Tieekjen daut du goodet aun mie deist, daut miene Fiend daut seenen motten un toschaund woaren, wiels du, Har, mie doch jeholpen un jetreest hast!

Currently Selected:

Psalmen 86: PB

Highlight

Compare

Copy