Psalmen 80
80
Hia ons, Hoad äwa Israel
1Een Psalm un een Zeichnis von Asaf, no de Leljenwies väatosinjen. 2Du Hoad äwa Israel, horch no ons! Du, dee Josef heeden deist aus eene Häad Schop, du, dee tweschen de Cheruben opp däm Troon setst, komm verendach! #2Sam 6,2; Psa 18,11 3Ver Efraim, Benjamin un Manasse, räaj diene Aulmacht opp un rad ons. 4Brinj ons wada trigj, oo Gott, un kjikj ons leeftolich aun, dan woa wie jerat sennen.
5Oo Har, aulmajchtja Gott, woo lang woascht du oajalich bliewen jäajen dien Volkj äare Jebäda? 6Du jefst an Tronenbroot to äten, un hast an maussenhauft väl Tronen to drinkjen jejäft. 7Du hast ons onse Nobasch toom Spott jemoakt, un onse Nobasch lachen äwa ons. 8Brinj ons wada trigj un kjikj ons leeftolich aun, dan woa wie jerat sennen.
9Du brochst eene Wienrank ut Ägipten; dan juachst du de Velkja äwa daut gaunze Launt un deetst dee doa plaunten. #Jes 5,1-7; Jer 2,21 10Du muakst Rum fa de Plaunt un leetst dee enwartlen, un dee haft sikj äwa daut gaunze Launt vespreet. 11De Plaunt bedakjt de Boaj met äaren Schauten, un de jewaultje Zeeda met äare Asta. 12Dee haft äare Auflaja bat aum Mäa jedräwen, un äare Asta bat aum Riefa. #Hos 10,1 13Wuarom hast du dän Goadentun doljebroaken, daut ar een jiedra beplekjen kaun, dee doa vebie jeit? 14De Schwien utem Bosch haben dän omjeweelt, un de wille Tieren han dän oppjefräten. 15Oo aulmajchtja Gott, komm trigj no ons. Kjikj vom Himmel rauf un see dit, un woak äwa dise Wienrank. 16Dee Wartel, dee diene rajchte Haunt jeplaunt haft, un dee du fa die selfst stoakj jemoakt hast. #Hos 11,1 17Dee es aufjeschnäden un met Fia vebrent. Dien Volkj kjemt om, wiels du an dreiwent aunkjikjst. #Hes 15,2-4
18Lot diene Haunt reiwen opp dän Maun aun diene rajchte Sied, dän Sän dän du fa die selfst stoakj jemoakt hast. 19Dan woa wie nich von die wajchgonen. Lot ons läwen, dan woa wie dienen Nomen aunroopen. 20Brinj ons wada trigj, oo du aulmajchtja Gott! Kjikj ons leeftolich aun, daut wie kjennen jerat woaren.
Currently Selected:
Psalmen 80: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
