Psalmen 79
79
Es Gott opp emma oajalich?
1Een Psalm von Asaf. Oo Gott, de Velkja sent en dien ieejnet Launt nenn jekomen; dee haben dienen heiljen Tempel veorreinicht un ut Jerusalem een Steenklompen jemoakt. 2Dee haben diene Deena äare Kjarpa no de Väajel unja däm Himmel to fräten jejäft, un diene fromme äa Fleesch no de Tieren em Launt. 3Dee haben rom Jerusalem äa Bloot vegoten, aus wan daut Wota wia, un doa wia kjeena de Doodes to begrowen. 4Wie sent fa onse Nobasch eene Schaundplak jeworden, een veachtenda Spott fa dee, dee om ons sent. #Psa 44,14
5Woo lang, oo Har? Woat dien Oaja emma bliewen? Woo lang woascht du diene Aufgonst brennen loten? 6Poasch dien Oaja äwa de Velkja, dee die nich kjanen; äwa de Kjennichsrikjs, dee dienen Nomen nich aunroopen. #Jer 10,25 7Dee haben Jakob to nuscht jemoakt un sien jeorwnet Launt en de Grunt jebrocht. 8Hool onse Vodasch äare Sinden nich jäajen ons; hab Metleet boolt äwa ons, wiels fa ons es nich mea väl jebläwen.
9Halp ons, oo Gott ons Heilant, om dienen Nomen to ieren. Rad ons un vejeff ons onse Sinden om dienen Nomen sient haulwen. 10Wuarom latst du de Velkja sajen: Wua es äa Gott? Lot ons daut noch seenen, daut du de Velkja doafäa strofst, daut see diene Deena äa Bloot vegoten haben. #Psa 115,2; Joel 2,17 11Lot de faustjenomne äa stänen ver die komen, un met dienen jewaultjen Oarm halp dee loostokomen, dee toom Doot veuadeelt sent. 12Oo Har, laj onse Nobasch säwenmol soo väl Spott oppem Kopp, aus see no die jeschmäten haben. #Psa 137,7-9
13Wie oba, dien Volkj un Schop opp diene Weid, woaren niemols opphieren die to danken, un woaren emma wada to onse Nokomen doavon räden, waut du jedonen hast.
Currently Selected:
Psalmen 79: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
