Psalmen 81
81
Jubel un Jehuarsom
1Een Psalm von Asaf, met de Jittoa väatosinjen. 2Sinjt met Freid to Gott, en däm onse Krauft steit. Jucht ut Freid to Jakob sienen Gott. 3Fangt aun to spälen, schlot de Drommel, un spält de Hoap un de Jittoa. 4Blost de Trompeet wan daut Niemon es, un uk wan daut Volmon es opp ons Fastdach, #3Mo 23,24 5wiels daut es soo Mood en Israel, von Jakob sienen Gott velangt. 6Dit sad hee en fa Josef un gaunz Israel toom Aundenkjen, aus see ut Ägipten jinjen, wua see eene framde Sproak hieeden. 7Gott sajcht: Daut wia de Dach aus ekj an de Laust von de Schulren neem, un äare Henj worden de Kjarw loos. #2Mo 6,6; Jes 9,3 8Aus du mie en diene Noot aunroopst, holp ekj die. Ekj auntwuad die ut de Jewitta Wolkj un vesocht die aum Wota bie Meriba. #2Mo 19,16; 17,2.7; 4Mo 20,13 9Horch emol, oo mien Volkj, un ekj woa die woarnen. Wan du bloos emol no mie horchen woascht, oo Israel. 10Jie sellen kjeenen framden Gott mank junt haben, un sellen kjeen framden Gott aunbäden. #2Mo 20,2-3 11Ekj sie de Har, dien Gott, dee die ut Ägipten rut brocht; moak dien Mul wiet op, ekj woa die daut fellen.
12Oba mien Volkj horcht nich no mie; Israel well mie nich. 13Doawäajen hab ekj an bie äare vestokte Hoaten jeloten, un see läwen no äa ieejnet gootdenkjen.
14Wan mien Volkj mie wudd jehuarsom sennen, un Israel en miene Wäaj gonen wudd, 15wudd ekj äare Fiend sea schwind unjadrekjen un miene Haunt jäajen äare Jäajna dreien. 16Dee dän Harn fientlich sent, wudden sikj ver am kjremmen un äare Strof wudd emma bliewen. 17Oba ekj wudd junt dän basten Weit to äten jäwen un met Honnich utem Steen saut moaken. #5Mo 32,13
Currently Selected:
Psalmen 81: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
