Psalmen 77
77
Troost en groote Veläajenheit
1Eent von Asaf siene Psalmen fa Jedutun, väatosinjen. 2Ekj schrieech to Gott om Help! Ekj schrieech to Gott, daut hee mie hieren sull. 3Wan ekj en Noot sie, sieekj ekj dän Harn. Miene Haunt wia de Nacht äwa utjestrakjt un wort nich meed, wiels miene Seel wull sikj nich treesten loten. 4Wan ekj aun Gott denkj, schrie ekj ut Veläajenheit, un denkj äwa de gaunze Sach no, un dan sinkjt mie de Moot. 5Du helst mie de Uagen op, daut ekj nich schlopen kaun. Ekj sie soo veläajen, daut ekj nich räden kaun.
6Ekj denkj aun de oole Tieden un aun de Joaren von ieescht emma. #Psa 143,5 7Ekj denkj de Nacht aun waut ekj jesungen hab, un räd met mien Hoat, un mien Jeist mott forschen. 8Woat de Har opp eewich vesteeten un kjeene Jnod mea bewiesen? 9Haft siene truhoatje Leew dan nu een Enj? Helt hee sikj nich mea aun sien Vespräakjen? 10Haft Gott vejäten Jnod to bewiesen, un em Oaja sien Metleet trigjehoolen? 11Un ekj säd: Dit es miene Schwakheit. Dän Aulahechsten siene rajchte Haunt kaun aules endren.
12Doawäajen denkj ekj doaraun, waut de Har jedonen haft. Ekj denkj aun diene väaje Wunda. 13Un ekj denkj äwa aul diene Woakjen no, un waut du nu deist. 14Gott, dien Wajch es heilich! Wua es een Gott, soo groot aus ons Gott? #2Mo 15,11 15Du best dee Gott, dee doa Wunda deit; du hast de Velkja diene Krauft bewäsen. 16Du hast dien Volkj derch dien jewaultjen Oarm jerat, Jakob un Josef äare Nokomen.
17De Wota sagen die, oo Gott, de Wota sagen die un hauden angst. De deepste Wota toobden. 18De dikje Wolkjen gooten Wota, de Rummel rold, un de Strolen fuaren han un häa. 19Daut rummeld em Himmel, diene Blitzen bedachten dän Ieedboddem, daut de Ieed doavon bäbd un scheddad. 20Dien Wajch wia em Mäa, un dien Stich en de groote Wota, wan uk kjeena diene Footspoaren seenen kunn. #(20 un 21) 2Mo 14,21-31 21Du brochst dien Volkj soo aus eene Häad Schop derch, met Moses un Aaron aus äare Hoad.
Currently Selected:
Psalmen 77: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
