Psalmen 74
74
Kloagen äwa de Venichtunk vom Heilichtum
1Unjarecht von Asaf. Gott, wuarom hast du ons opp emma vestat, un wuarom jläat dien Oaja jäajen diene ieejne Schop opp diene Weid? 2Denkj aun diene Jemeent, dee du lang trigj fa die vesorcht hast; daut es dien Volkj, woont du die loosjekoft hast. Denkj aun dän Boajch Zion, wua du wonst. #Psa 76,3
3Go emol äwa dän Tempel, dee aul soo lang doljebroaken licht; de Fient haft em Heilichtum aules en de Grunt jebrocht. 4Doa wua wie ons met die tooptrafen, es nu diene Fiend äa Jeschrech to hieren. Dee haben sikj äare ieejne Flagen oppjestalt. 5Daut sitt soo aus wan doa wäa es met eene Akjs mank jewast, aus wan hee een Woolt dolhakt. 6Dee haben aul daut utjeoabeide Straums met äare Biels un Akjsen to Grus jeschloagen. 7Dee haben dien Heilichtum jlikjs de Ieed doljebrent. Dee haben dän Plauz, dee no dienen Nomen jenant woat, veorreinicht. #2Kjen 25,9 8Dee haben sikj em Hoat jesajcht: Wie wellen dee gaunz unjaklunjen. Dee haben aule Städa em Launt doljebrent, wua Gott aunjebät wort. 9Ons woaren kjeene Wundatieekjens mea jejäft; doa sent kjeene Profeeten jebläwen, un kjeena von ons weet woo lang dit soo bliewen woat.
10Woo lang, oo Gott, woat de Fient noch äwa die spotten? Woat de Fient emma äwa die schempen? 11Wuarom helst du diene Haunt trigj? Nemm diene rajchte Haunt ut de Fupp un moak een Enj met an.
12Oba du, oo Gott, best mien Kjennich ut oole Tieden. Du hast ons eene Radunk em Launt jebrocht. 13Du deetst derch diene jewaultje Krauft daut Mäa uteneen deelen. Du bruakst de groote Droaken em Wota de Kjap. #2Mo 14,21-22; Psa 104,6-8; Jes 27,1 14Daut wieescht du, dee de Leviatan de Kjap vekjwatscht, un doamet de Tieren en de Wiltnis foodad. #Hiob 40,25 15Du leetst Kjwalen un Wotastreem äwadäl komen, un du leetst stoakje Streem utdrieejen 16De Dach es diena, un die jehieet uk de Nacht. Du hast Sonn un Mon häajestalt. #Psa 104,19 17Du hast aule Jrensen tweschen Launt un Wota jetrocken; du hast uk Somma un Winta jemoakt.
18Denkj doaraun, oo Har, woo de Fient äwa die jespott haft, woo de Menschen äwa dienen Nomen jespott un jeschempt haben. 19Jeff dien Volkj, daut doa soo schwak es aus eene junge Duw, nich no de wille Tieren. 20Hool die aun dienen Bunt, wiels de Lenda opp de Ieed, dee em diestren sent, woaren von kjwälarische Menschen bewont. 21Lot de unjadrekjte nich beschämt trigj gonen. Lot de schwake un oame dienen Nomen lowen. 22Sto opp, oo Gott, un sto en fa diene Sach; denkj doaraun, woo de Noaren die dän dachäwa spotten. #Psa 14,1-3 23Vejat nich diene Fiend äa Jeschrech, un woo diene Jäajna äa Klommua biem toonämen blift.
Currently Selected:
Psalmen 74: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
