Psalmen 73
73
Daut dredde Buak
(Psalmen 73 – 89)
Gott, ekj jehia no die
1Een Psalm von Asaf. Gott es bestemt goot to Israel, to dee, dee een reinet Hoat haben. 2Oba waut mie aunbelangt, miene Feet hauden meist jejlept; ekj wia sea meist jefollen. 3Ekj wia aufjenstich von de stolte Pucha, aus ekj sach, woo goot de gottloose daut jinkj. #Hiob 21,7
4Dee haben kjeene Kwol; dee sent em Kjarpa jesunt un stoakj. 5Dee haben nich Trubbel soo aus aundre Menschen, un dee sent uk nich soo jeploacht aus aundre Menschen. 6Äa Stolt henjt om an aus een Haulskjädkje, un see haben sikj met Jewault uteewen jekjleet. 7See sent fat daut an de Uagen schwalen. See haben mea aus daut Hoat sikj denkjen kaun. 8Äare Räden sent spottent un veachtent, en äaren Stolt driewen see to unjadrekjen. 9Met äa Mul räden see soo aus wan see dän Himmel ieejnen, un met de Tung soo aus wan see de Ieed ennämen. 10Doawäajen kjemt sien Volkj no an un see drinkjen sikj daut aula en, aus wan see een Kuffel Wota ladich drunken, 11un sajen: Woo kaun Gott weeten? Weet de Aulahechsta waut hia väajeit? #Psa 10,11 12Dit es soo aus de gottloose sent, onen Sorjen, un see woaren emma rikja.
13Daut haft nuscht jeholpen, daut ekj nich en Sind läwd. Daut haft mie nuscht jenuzt, daut ekj mien Hoat un miene Henj hab rein jehoolen. #(13 un 14) Mal 3,14 14Ekj sie dän dachäwa jeploacht worden, un ekj sie aule Morjen jestroft worden. 15Wan ekj jeplont haud, daut ekj soo räden wudd, dan wia ekj dien Volkj nich tru jebläwen. 16Aus ekj dit aula proowd to vestonen, wia daut too unjadrekjent fa mie, 17bat ekj en Gott sien Heilichtum nenn jinkj un doa vestonen kunn, waut de gottloose fa een Enj neemen.
18Du stalst dee bestemt opp glauten Boddem; du statst dee rauf, daut see omkomen. 19Woo dee doch soo plazlich omkomen! Angst un Schrakjen ritt dee met sikj. 20Soo aus eena een Droom nich achten deit wan eena oppwakjt, soo woascht du, oo Har, dee nich achten, wan du oppsteist, dee to rechten. 21Aus ekj em Hoat truarich, un em Jeist vebettat wia, 22wia ekj een Noa un wist nich bäta; ekj wia ver die aus een Tia.
23Un doch hool ekj mie emma bie die opp; du helst mie aun de rajchte Haunt. #Reema 8,35-39 24Du woascht mie met dienen Rot väastonen, un mie nohäa met Ieren aunnämen. #Psa 49,16 25Wäm hab ekj em Himmel buta die? Doa es nuscht opp de Ieed, daut ekj haben mucht, buta die. 26Mien Kjarpa un mien Hoat mäajen vesajen oba Gott es de Krauft en mie, un woat daut eewich bliewen. #Psa 16,5
27Dee, dee von die wiet auf sent, woaren omkomen. Du brinjst dee aula om, dee die ontru sent. 28Oba fa mie es daut goot dicht bie Gott to sennen. Ekj hab mien vetruen en Gott dän Harn jesat, daut ekj von aul diene Woakjen räden kaun.
Currently Selected:
Psalmen 73: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
