Psalmen 72

Säajenswensch fa dän Kjennich

1Von Salomo. Gott jeff däm Kjennich, daut hee met dien jerajchtet Jerecht rechten un rejieren kaun; un jeff diene Jerajchtichkjeit dän Kjennich sien Sän. 2Lot am dien Volkj jerajcht rechten, un met Jerajchtichkjeit diene oame utem Älent raden. 3Auf opp de Boaj ooda de kjliene Humpels, Jerajchtichkjeit saul dien Volkj em gaunzen Launt Fräd brinjen.

4Hee saul de unjadrekjte em Volkj to rajcht vehalpen, un de oame äare Kjinja raden, un dee enne Grunt brinjen, dee Jewault eewen. 5Derch aule Jennerazionen saul am aulemaun ferchten soo lang aus de Sonn un de Mon doa sent. 6Hee saul soo sennen aus Räajen opp daut aufjeschnädnet Graus, soo aus een Sodda, dee daut Launt aunfeicht. 7En siene Tiet woat de Jerajchtichkjeit blieejen, un aules woat frädlich sennen bat de Mon nich mea es. 8Hee woat von een Mäa bat daut aundre rejieren, un vom Riefa aun bat äwa de gaunze Ieed. #Sach 9,10 9Daut Volkj en de Wiltnis woat sikj ver am bieejen, un aul siene Fiend woaren am deenen. #Jes 49,23 10De Kjennichs von Tarsis un von de Inseln woaren Jeschenkja brinjen. De Kjennichs von Rikj Arabien un Seba woaren uk äare Gowen brinjen. #1Kjen 10,1-2; Psa 68,30; Jes 60,9 11Aule Kjennichs woare sikj ver am bieejen. Un aule Velkja woaren am deenen.

12Wiels hee woat de oame raden wan dee schrieen, uk de unjadrekjte, dee kjeenen Helpa haben. #Hiob 36,15 13Hee woat äwa de schwake un oame Metleet haben, un de oame woat hee vom Doot raden. 14Hee woat an von dee raden, dee an unjadrekjen un vejewaultjen; äa Bloot es ver am huach un dia. #Psa 9,13; 116,15

15Mucht de Kjennich lang läwen! Mucht am Golt von Rikj Arabien jeschonken woaren. Muchten de Menschen emma fa am bäden, un am dän dachäwa säajnen. 16Mucht doa jenuach Jeträajd em Launt sennen, un de Boaj bat bowen dicht voll stonen, soo aus opp däm Libanon, un en de Städa sellen dee utjreenen, soo aus Graus opp de Stap. 17Sien Nomen saul eewich bliewen; mucht dee soo lang bliewen aus de Sonn. Aule Velkja woaren derch am jesäajent woaren, un woaren sajen, daut hee jesäajent es. #1Mo 12,3; 22,18

18Loft dän Harn, Israel äaren Gott, de eensja dee doa Wundawoakjen deit. #(18 un 19) Psa 41,14 19Sien harlicha Nomen saul eewich jeloft woaren; siene Harlichkjeit saul äwa de gaunze Ieed rieekjen. Amen. Amen. #Jes 6,3 20Dit sent de latste von David, Isai sienen Sän, siene Jebäda.

Currently Selected:

Psalmen 72: PB

Highlight

Compare

Copy