Psalmen 71

Een Jebäd fa Schutz en sienem huagen Ella

1 Har, ekj velot mie opp die; lot mie niemols toschaund woaren. 2Rad mie, wiels du jerajcht best, un halp mie; horch no mie un rad mie. 3Sie du fa mie eene sechre Städ, no dee ekj emma komen kaun. Du hast vesproaken mie to raden. Du best mien steenfausta Schutz, hinja dän ekj secha sto. #Psa 31,3-4

4Gott, rad mie ut de gottloose äare Henj; ut de Kleiwen von de ojjerajchte un dee waut Jewault eewen. 5Wiels du best miene stoakje Hopninj, oo Har Gott, opp die hab ekj mie von junk aun veloten. 6Aun die hab ekj mie von Jeburt aun jelänt; du hast mie ut miene Mutta äaren Lief jetrocken. Ekj well die emma lowen. 7Ekj sie fa väle een Wunda jeworden, oba du best fa mie een sechra Toofluchtsuat. 8Ekj woa aule Dach goodet von die räden un die lowen.

9Veschmiet mie nich wan ekj ieescht oolt sie, un velot mie nich wan ekj schwak woa. 10Wiels miene Fiend räden jäajen mie, un dee, dee opp de Lua ligjen mie doottomoaken, sajen sikj en äare Berodunk: 11Gott haft am veloten; sat am no un jriept am; doa es kjeena am to raden.

12Gott, sie du dicht bie mie; mien Gott, komm schwind mie halpen! 13Muchten miene Vekjläaja en Schaund omkomen. Muchten dee en Spott un Schaund to stonen komen, dee mien Ojjlekj sieekjen.

14Oba ekj woa mien Hopen niemols oppjäwen, un woa aunfangen die emma mea to lowen. 15Ekj woa dän dachäwa von diene Jerajchtichkjeit un von diene Radunk räden, wan ekj uk nich weet woo groot dee sent. 16Ekj woa en Gott dän Harn siene Krauft omhäa gonen, un ekj woa doavon räden daut eensich du jerajcht best.

17Oo Gott, du hast mie von junk aun jelieet, un ekj räd bat vondoag dän Dach von diene Wundawoakjen. 18Un wan ekj ieescht oolt un greiw sie, oo Gott, velot mie uk dan nich bat ekj Kjinja un Grootkjinja jesajcht hab, woo stoakj du best, un von diene Krauft jerät hab to aul dee, dee noch komen sellen. #Jes 46,4 19Diene Jerajchtichkjeit, oo Gott, rieekjt batem hechsten Himmel, du dee doa groote Dinja jedonen hast. Wäa, oo Gott, es soo aus du? 20Wan du mie uk hast väl betre Trubbels seenen loten, du hast mie bat doa jebrocht, daut ekj wada oppläwd. Du woascht mie von deep ut de Ieed rutholen. #1Sam 2,6 21Du woascht mie sea groot moaken, un woascht mie wada treesten.

22Ekj woa die mien Gott, met Hoapenspell doafäa lowen, daut du soo tru best. Ekj woa die, mien Gott, uk met Jittoarenspell lowen, du Heilja äwa Israel. #2Kjen 19,22; Jes 43,3 23Ekj, dän du jerat hast, woa froo sennen un die derch sinjen lowen. 24Ekj woa dän dachäwa von diene Jerajchtichkjeit räden. Wiels dee, waut mie em Ojjlekj brinjen wullen, musten sikj schämen un sent toschaund jeworden.

Currently Selected:

Psalmen 71: PB

Highlight

Compare

Copy