Psalmen 7

Gott veschauft mie rajcht

1David sinjt ver däm Harn von siene Oschult doarenn waut Kusch, de Benjaminita, von am säd. 2Oo Har mien Gott, ekj sat mien vetruen opp die. Rad mie von aul dee, dee mie nostonen, un stal mie frie, 3daut see mie nich, soo aus een Leiw, to hoolen kjrieen un miene Seel verieten, wiels kjeena doa es, mie to raden.

4Oo Har mien Gott, wan ekj dit jedonen hab, wan doa Ojjerajchtichkjeit en miene Henj es, #Hiob 31,7-34 5wan ekj dee schlajchtet toojesat hab, dee frädlich met mie läwden, ooda mienen Fient onen Uasoak Schoden toojesat hab, 6dan lot mien Fient mie nostonen un unjakjrieen. Jo, lot am mien Läwen en de Ieed nenn klunjen, un miene Iea em Stoff lajen. 7Sto opp, oo Har, en dienen Oaja. Stal die jäajen miene Fiend äare Rach. Moak die äwahäa, oo Har, wiels du hast rajcht jerecht. 8Lot de Menschen sikj om die saumlen, un rejia vom Himmel äwa an.

9Du, Har, best Rechta äwa aule Velkja. Recht mie Har, doano aus ekj jerajcht un fromm sie. #Psa 18,21-27 10Lot daut met de gottloose äa schlajchtet to Enj komen, oba lot de jerajchte to äa rajcht komen; wiels du jerajchta Gott deist de Jedanken em Hoat opp de Proow stalen. #Psa 104,35; 139,1; Jer 11,20; Opb 2,23 11Mien Schilt es de aulahechsta Gott, dee dän raden deit, dee eene opprechtje Jesennunk haft. 12Gott es een jerajchta Rechta. Un Gott lat sien Oaja jieda Dach äwa de gottloose komen.

13Wan Menschen nich von äare Sinden wajchdreien wellen, haft hee sien Schwieet jeschoapt, sien Boagen utjerakjt un zielt. #5Mo 32,41 14Hee haft doa eene brennende Feil nopp jelajcht, dee doa secha doot moakt. 15Kjikjt, de gottloosa haft beeset em Senn, es voll Ojjlekj un brinjt Läajes verendach. 16Hee haud een Loch jegroft un utjeholt, un es selfst em Growen jefollen, dän hee jegroft haud. #Spr 26,27 17Sien Ojjlekj, daut hee fa aundre plond, woat am opp sienen ieejnen Kopp faulen, un sien Vebräakjen woat am opp sienen ieejnen Schädel faulen.

18Ekj well dän Harn fa aul siene Jerajchtichkjeit danken, un well dän aulahechsten Harn sienen Nomen lowen.

Currently Selected:

Psalmen 7: PB

Highlight

Copy

Compare