Psalmen 69

Om Gott sient haulwen en Schaund schmachten

1Eent von David siene Psalmen, no de Leljenwies väatosinjen. 2Rad mie, Gott, wiels daut Wota kjemt mie batem Hauls. 3Ekj vesinkj em deepen gruntloosen Somp; ekj sie em deepen Wota nenn jeroden, wua mie de Walen äwa däm Kopp gonen. 4Ekj hab mie meed jeschräajen; mien Hauls es heesch; miene Uagen woaren schwak von soo lang no Gott sieekjen. 5Dee waut mie onen Uasoak nich lieden kjennen, sent mea aus ekj Hoa opp däm Kopp hab. Ekj hab väl stoakje Fiend onen Uasoak, dee mie vesieekjen omtobrinjen. Dee bemotten mie trigj to brinjen, waut ekj nich jestolen hab. #Joh 15,25

6Oo Gott, du weetst woo vekjieet ekj wia, un miene Sinden sent fa die nich vestoaken. 7Muchten dee, dee äare Hopninj en die haben, nich wäajen mie toschaund woaren, oo Har, du Aulmajchtja Har. Muchten dee, dee die sieekjen sikj nich schämen brucken, oo Gott en Israel. 8Daut es om dient haulwen, daut ekj veacht sie, un mien Jesecht met Schaund bedakjt es. #Psa 44,23 9Ekj sie een framda mank miene Breeda, un miene Mutta äare Kjinja kjanen mie nich. #Psa 38,12 10Wiels de Aufgonst om dien Hus brent en mie, un dee äare Lastrungen, dee die lastren, sent opp mie jefollen. #Psa 119,139; Joh 2,17; Reema 15,3 11Un wan ekj hiel un faust, woat äwa mie jespott. 12Wan ekj mie Truakjleeda auntrakj, woat äwa mie jespott. 13Dee doa aum Puat setten, räden jäajen mie, un de Drinkja dichten Leeda von mie. #Hiob 30,9

14Oba ekj bäd to die, oo Har. Wan du daut ieescht fa goot aunsitst, dan lot wäajen diene truhoatje Leew, diene Auntwuat miene Radunk sennen. #Jes 49,8 15Rad mie utem Somp un lot mie nich vesinkjen; rad mie von miene Fiend un utem deepen Wota. 16Lot de Äwaschwamunk nich äwa mie komen, lot mie nich em deepen Wota vedrinkjen, un lot daut Grauf sikj nich äwa mie toomoaken. #1Mo 29,3

17Oo Har, lot diene Auntwuat doano sennen aus du leeftolich best. En diene groote Jnod un Metleet komm du no mie opptoo. #(17 un 18) 4Mo 6,26 18Vestäakj dien Jesecht nich fa dienen Kjnajcht; auntwuat mie schwind, wiels ekj sie en Trubbel. 19Komm no mie un rad mie; rad mie om miene Fiend äat haulwen. 20Du weetst woo ekj jeschullen, vespott un toschaund jemoakt woa; miene Fiend sent aula ver die. 21Spott haft mie daut Hoat jebroaken, un haft mie helploos jeloten; ekj socht no wäm, dee doa Metleet haud, oba doa wia kjeena, un no Treesta, oba ekj funk kjeene. 22See menjden mie Gaulsua em Äten un jeewen mie en mienen Darscht Ädikj to drinkjen. #Mat 27,34.48

23Lot äa ieejna Desch eene Faul fa an woaren, daut see sikj faustranen un an trigjetolt woat. #(23 un 24) Reema 11,9-10 24Muchten an de Uagen vedunklen daut see nich seenen kjennen, un muchten see emma vekjräpelt sennen. 25Jeet diene Rach äwa an, un lot dien brennenda Oaja an unja kjrieen. 26Mucht äare Woninj vewilren, un mucht doa kjeena mea bennen wonen. #Apost 1,20 27Wiels see stonen dän no, dän du jeschloagen hast, un vetalen sikj jieren, woo du an vewunt hast. 28Lot dee en eene Sind no de aundre faulen daut see nich met diene jerajchte to stonen komen. 29Muchten dee utem Läwensbuak jestrikjt woaren, daut see nich met de jerajchte enjeschräwen sent. #2Mo 32,32-33; Dan 12,1; Luk 10,20; Flp 4,3 30Ekj mott väl lieden un hab väl Weedoag. Rad mie, oo Gott, un jeff mie eene sechre Städ.

31Ekj woa Gott sienen Nomen met Leeda lowen, un am derch danken veharlichen. 32Daut woat de Har leewa haben aus een Opfa von eenen Boll, dee Hieena un Kleiwen haft. #Psa 50,8-13 33De unjadrekjte woaren daut seenen un sikj freien, un dee waut Gott sieekjen, dän woat daut Hoat oppläwen. #Psa 22,27 34Wiels de Har hieet de oame, un veacht nich de sienje, dee doa faustjenomen sent.

35Lot Himmel un Ieed un Mäa am lowen, un aules waut sikj doabennen bewäacht. 36Wiels Gott woat Zion halpen, un Juda äare Städa wada oppbuen. Dan woaren de Menschen doa wada aunsiedlen un dee ieejnen. 37Siene Deena äare Kjinja woaren dee oawen, un dee von sienen Nomen väl hoolen, woaren doabennen wonen.

Currently Selected:

Psalmen 69: PB

Highlight

Compare

Copy