Psalmen 68

Gott brinjt Siech

1Eent von David siene Psalmleeda, väatosinjen. 2Lot Gott oppstonen, daut siene Fiend vejoacht woaren, un daut dee, dee am nich lieden kjennen, fa am ranen. #4Mo 10,35 3Soo aus Ruak vom Wint wajch jeblost woat, soo blos du dee wajch. Un soo aus Waus vom Fia schmelt, muchten de gottloose ver Gott omkomen. 4Oba muchten de jerajchte sikj ver Gott freien un froo sennen, un sikj von Hoaten freien.

5Sinjt to Gott, sinjt, sienen Nomen to lowen! Moakt een Huachwajch reed fa däm, dee derch de Wiltnis foat. Sien Nomen es Har, un freit junt to am. #Jes 57,14 6Een Voda fa dee onen Voda, un eena, dee no de Wätfrues äa rajcht sitt, es Gott, dee en sien heiljen Tempel wont. #Psa 10,14 7Gott jeft de eensome eene Famielje; hee lat de faustjenomne loos, oba de wadaspanstje bliewen en een drieejet Launt.

8Gott, aus du bie dien Volkj veropp jinjst, aus du an derch de Wiltnis leidsd, #2Mo 13,21 9don bäbd de Ieed. Un vom Himmel plenjad de Räajen ver dän Gott von Sinai, ver Gott dee Israel äa Gott es. #2Mo 19,16-18 10Du schekjst dien Oafgoot jenuach Räajen, daut utjedrieejde Launt opptofreschen. 11Dien Volkj wond doabennen, un du, oo Gott, wieescht soo goot un sorjsd fa de oame. 12De Har jeef daut Wuat, un doa wieren väle, daut wieda to jäwen. #Jes 52,7 13Kjennichs un Armeeen randen doavon, un de Frues, dee doa tusjebläwen wieren, deelden dan en, waut toopjerooft wia. 14Soogoa dee, dee bie de Schophäaden jebläwen wieren, kjrieejen feine Sachen, soowaut aus selwane Duwenfiguaren, met goldne Fadren en de Flichten. 15Aus de Aulmajchtja de Kjennichs vestreid, wia daut Launt bedakjt, aus wan daut en Zalmon schnied. 16De Baschan Boaj sent Gott siene Boaj; de Baschan Boaj sent groote Boaj. 17Wuarom kjikj jie groote Boaj met Aufgonst no dän Boajch, wua Gott lost haft to wonen? Jo, de Har woat doa uk emma bliewen. #Psa 132,13 18Gott haft väl dusende mol dusende Woages, un de Har es unja an aum heiljen Boajch Sinai. 19Aus du en de Hecht foaren deetst, neemst du faustjenomne met die; Menschen jeewen die Gowen, soogoa soone dee jäajenaun wieren, daut Gott, de Har, doa wonen kunn. #Efs 4,8-10

20Loft dän Harn, onsen Heilant, dee däachlich onse Lausten drajcht. #1Kor 10,13 21Wie haben een Gott, dee doa halpt, de Har Gott, dee vom Doot rat. 22Gott woat siene Fiend bestemt de Kjap tweischlonen, dee noch een Kopp voll Hoa haben un biem sindjen bliewen. 23De Har sajcht: “Ekj woa diene Fiend von Baschan holen, un ekj woa dee von unjen em Mäa häabrinjen, 24daut du met diene Feet en diene Fiend äa Bloot klunjen kaust, un diene Hunj sikj doavon saut lekjen.”

25Dee haben jeseenen, woo du, oo Gott, veropp jeist, woo du, mien Gott un Kjennich, em Heilichtum nenn jeist. #2Sam 6,13-15; Psa 24,7 26De Sinja jinjen taksfootich veropp un de Musikaunten hinjaraun met de Mejales, dee dän Drommel Takt schluagen: #2Mo 15,20 27Loft Gott en de groote Vesaumlunk! Loft dän Harn en Israel äare Vesaumlunk! #Jes 48,1 28Ieeschtens kjemt Benjamin, de kjlansta Staum, dan Juda met siene groote Häad Leida, dan de Leida von Sebulon un von Naftali.

29Bewies diene Krauft, oo Gott; lot ons seenen woo stoakj du best, oo Gott, soo aus du verhäa jedonen hast. 30Om dien Tempel en Jerusalem sient haulwen, woaren Kjennichs die Jeschenkja brinjen. #Psa 72,10 31Doo du daut Volkj trajchtwiesen, daut soo aus een Beest mankem Schelp es. Doo uk de Velkja trajchtwiesen, dee soo aus eene Häad Bolles un Kjalwa sent. Lot dee sikj aula ver die bieejen un die Selwa brinjen. Driew dee uteneen, dee doa jieren kjriejen. 32De väaschte von Ägipten woaren komen; dee von Ätiopien woaren äare Henj opphäwen un to Gott bäden. #Jes 18,7; 19,21; 45,14; Apost 8,27

33Sinjt to Gott, jie Kjennichsrikjs opp de Ieed, sinjt un loft dän Harn; 34dän, dee äwa aule Himmels Himmel foat, dee doa emma jewast sent; dän, dee en däm jewaultjen Rummel rät. 35Rät von Gott siene Macht! Siene Harlichkjeit es äwa Israel, un siene Krauft es en de Wolkjen. 36Gott, du best to bewundren en dien Heilichtum. Israel äa Gott selfst jeft de Menschen Krauft, stoakj to woaren. Loft onsen Gott!

Currently Selected:

Psalmen 68: PB

Highlight

Compare

Copy