Psalmen 66
66
Een Dankleet fa Gott siene Help
1Een Psalmleet, väatosinjen. Jucht to Gott, aule Velkja oppe Ieed! 2Sinjt lowent sienen Nomen to ieren; sajcht aulem woo harlich hee es. 3Sajcht to Gott: Woo wundavoll sent doch diene Woakjen! Diene Krauft es soo groot, daut diene Fiend sikj ver die kjremmen. 4Aulemaun oppe Ieed deit die aunbäden. See lowen die met Leeda; see sinjen un lowen dienen Nomen.
5Komt un kjikjt waut Gott jedonen haft. Woo wundavoll sent doch siene Woakjen om de Menschen äat haulwen! 6Hee muak ut daut Mäa drieejet Launt. See jinjen tofoot derch däm Riefa. Komt, well wie ons to am freien. #2Mo 14,21-22; Jos 3,16-17 7Hee rejieet eewich derch siene Krauft; siene Uagen seenen waut de Velkja doonen. Lot de wadaspanstje nich jäajen am oppstonen. 8Loft onsen Gott, jie Velkja; lot daut to hieren sennen, daut jie am lowen, 9dee onse Seelen aum läwen helt, un onse Feet nich jleppen lat. 10Wiels du, oo Gott, hast ons utjeprooft; du hast ons derch däm Fia jeschekjt, soo aus Selwa jereinicht woat. #Spr 17,3 11Du leetst ons faustnämen, un lädsd ons schwoare Lausten opp de Rigjes. 12Du brochst daut bat doa, daut Menschen ons äwa de Kjap fuaren; wie jinjen derch Fia un Wota; oba du brochst ons no een Plauz wua wie aules vollopp hauden. #Jes 43,2
13Ekj woa met Brauntopfa en dien Tempel nenn gonen un die betolen waut ekj vesproaken hab, 14daut, waut äwa miene Leppen kjeem un mien Mul vespruak, aus ekj en Trubbel wia. 15Ekj woa die fate Schop aus Brauntopfa brinjen, uk een Opfa von Schopsbakj. Ekj woa uk Bolles un Kosen opfren.
16Komt un horcht aula, dee jie Gott ferchten, un ekj woa junt sajen waut hee fa mie jedonen haft. 17Ekj schrieech am aun ut vollem Hauls; ekj lowd am met mien Mul. 18Wan ekj met Ojjerajchtichkjeit em Hoat omjinkj, wudd de Har nich no mie jehorcht haben. #Spr 28,9 19Oba Gott haft bestemt no mie jehorcht, un doaropp jeacht waut ekj bäden deed. 20Ekj low Gott, dee mien Jebäd nich vestad un siene truhoatje Leew nich von mie trigjhilt.
Currently Selected:
Psalmen 66: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
