Psalmen 65

Dank fa Gott siene Wundawoakjen

1Eent von David siene Psalmen, väatosinjen. 2Gott, du woascht en Zion en Ieaforcht jeloft woaren, un wie woaren die jäwen, waut wie vesproaken haben. 3Du hieescht onse Jebäda, doawäajen kjemt aulemaun no die. 4Aus de Sind bie ons Äwahaunt neem, vejeefst du ons onse Äwaträdungen. 5Jesäajent sent dee, dee du die wälst un no die nemst, bie die opp däm Tempelhoff to wonen; wie haben vollopp aul daut goode en dien Hus, dien heilja Tempel. #5Mo 4,7; Psa 63,3-4; 84,2-5

6Du auntwuatst ons derch jewaultje Wundawoakjen un Jerajchtichkjeit, oo Gott onse Radunk. Du best de eensje Hopninj fa aulem, soo wiet aus Ieed un Mäa rieekjen. 7Du, dee du derch diene Krauft de Boaj häajestalt hast, du bewiest doaderch diene Macht. 8Du, dee daut ruzhende Mäa stellen deist, du stelst de Walen äa Jeruzh un de Velkja äa tooben. #Psa 89,10 9Dee doa wiet auf wonen, haben Respakjt fa diene Wunda. Du moakst daut de Sonnen Oppgank un de Sonnen Unjagank met Freiden sinjen.

10Du sorchst fa daut Launt un latst daut räajnen, un moakst daut doaderch sea rikj. Gott siene Wotastreem sent voll, de Menschen met Jeträajd to vesorjen, wiels soo hast du daut enjerecht. #Psa 67,7 11Du schekjst Räajen daut Pluachlaunt auntofeichten un de Kjlieta opptowieekjen. Du helst daut Launt wieekj derch Räajenschwoakja, un säajenst de Arnt. #Psa 104,13-16 12Du kjreenst daut Joa met väl goot, un doa wua du jeist, es mea aus jenuach. 13De Weidstapen un de Wiltnis sent uk dikj voll, un de läaje Boaj omhäa sent froo un lostich. 14De Weidlenda sent voll Schop, un de Schluchten sent met Jeträajd bedakjt. Dee sent froo, daut see schrieen un sinjen.

Currently Selected:

Psalmen 65: PB

Highlight

Compare

Copy