Psalmen 64

Gott sien Jerecht äwa heemliche Fiend

1Eent von David siene Psalmen, väatosinjen. 2Gott, horch woo ekj mie em Jebäd bekloagen doo; bewoa mien Läwen fa miene jreselje Fiend. 3Bewoa mie fa de beese äare Aunschläaj, un waut de schlajchte jäajen mie jeplont haben. 4Dee schoapen sikj äare Tungen aus Schwieed, un zielen met äare jeftje Wieed aus met Feilen. 5Dee scheeten utem Vestäakj no een oschuldjen Maun; see scheeten plazlich no am onen sikj to ferchten.

6Dee spräakjen sikj unjarenaunda Moot too en äare beese Plons. See räden von heemlich Schlenjen lajen, un sajen: Wäa woat daut seenen? #Psa 94,7 7See plonen Ojjerajchtichkjeit. Wie haben ons een volkomnen Plon utjedocht, sajen see. Wiels een Mensch sien Hoat un siene Jedanken sent een Jeheemnis.

8Oba Gott woat dee met Feilen scheeten; dee woaren plazlich hanjestrakjt woaren. 9Hee woat äare ieejne Wieed jäajen an dreien, un an en de Grunt brinjen. Un wäa an sitt, woat äwa an spotten un met däm Kopp schedren. 10Aule Menschen woaren sikj ferchten un sajen: Daut haft Gott jedonen! un woaren doaräwa nodenkjen, waut hee jedonen haft. #2Mo 8,15 11De jerajchte woaren sikj em Harn freien, un sikj opp am veloten. Wäa em Hoaten opprechtich es, saul am lowen.

Currently Selected:

Psalmen 64: PB

Highlight

Compare

Copy