Psalmen 60

Een Jebäd en groote Noot

(Varzh 7-14: 108,7-14)

1Een goldnet Jeschenkj von David, väatosinjen no de Roosen Wies; 2aus hee jäajen de Aramäa bie Mesopotamien un de Aramäa von Zoba jekjriecht haud, aus Joab trigj jinkj un 12.000 Edomita en de Soltjäajent doot schluach. #2Sam 8,3.13; 10,13.18 3Gott, dee du ons vestat hast un onse Fiend hast äwa ons komen loten, un wieescht veoajat äwa ons, recht ons wada opp! 4Du hast daut Launt vescheddat un opjeräten; heel de Räten, wiels daut Launt bewäacht sikj noch. 5Du hast dien Volkj derch schwoare Tieden jefieet; du hast ons Wien jedrenkjt wuavon wie schwäakjten. #Psa 75,9 6Oba fa dee, dee die ferchten hast du eene Flag oppjetrocken, hinja dee see secha stonen. #2Mo 17,15 7Rad ons met diene rajchte Haunt un auntwuat opp ons Jebäd, daut dien Volkj, daut du goot best, kaun jeholpen woaren. #(7-14) Psa 108,7-14

8Gott räd en sien Heilichtum un säd: Ekj sie froo daut ekj Sichem endeelen kaun un uk daut Sukkot Tol utmäten. 9Gilead es mient, un Manasse es mient. Efraim es miene Koppbedakjunk, un Juda halpt mie daut Jesaz uttofieren. #1Mo 49,10 10Moab es miene Wauschbett, un äwa Edom schmiet ekj miene Schoo, un äwa de Filista schrie ekj em Triumf.

11Wäa woat mie en de stoakje Staut nenn brinjen? Wäa woat mie en Edom nenn leiden? 12Woascht du daut nich doonen, oo Gott, du dee ons vestatst un nich mea met onse Kjrieja met jeist? 13Sto ons bie en onse Noot, wiels Menschenhelp halpt nuscht. 14Wan Gott met ons es, woa wie fauststonen. Hee woat onse Fiend unjaklunjen.

Currently Selected:

Psalmen 60: PB

Highlight

Compare

Copy