Psalmen 59
59
Een Jebäd beschizt to bliewen
1Een goldnet Jeschenkj von David, daut hee nich omkjeem aus Saul wäm schekjt sien Hus to bewoaken, daut hee am doot moaken kunn. #1Sam 19,11 2Rad mie von miene Fiend, oo mien Gott, beschitz mie von dee, dee jäajen mie komen. 3Rad mie von de beese, un bewoa mie fa Menschen, dee mie jieren doot moaken wellen. 4See emol, woo dee fa mie opp de Lua ligjen; de stoakje stonen sikj toop jäajen mie, wua ekj nich schuldich sie, uk nich jesindicht hab, oo Har. 5Ekj hab nuscht orrajchtet jedonen, un doch sent see reed mie auntojriepen. Moak die opp un komm halp mie! Kjikj emol no miene Loag. 6Oo Har Gott, du Aulmajchtja, Israel äa Gott, sto opp aule Velkja to strofen; bewies de beese Veroda kjeen Jaumahoat.
7Dee komen zeowes trigj, ranen derch de Staut un julen aus de Hunj. 8Kjikj waut dee utem Mul spieen; dee spieen Schwieed ut un sajen dan: Wäa woat daut hieren? 9Oba du, oo Har, lachst äwa an, un spotst äwa aule Velkja. 10Ekj woa mie aun die hoolen, wiels du, oo Gott, best miene Krauft, dee mie secha helt, mien leewa Gott. #Psa 9,10-11
11Mien truhoatich leeftolja Gott woat mie entjäajen komen, un mie miene Fiend äa Ojjlekj seenen loten. 12Oba moak dee nich doot, oo Har, ons Schilt, wiels dan wudd ons Volkj daut vejäten, oba bruck diene Macht, dee to vestreien un opp de Kjneeen to brinjen. 13Lot an en äa Stolt jejräpen woaren wiels äare sintelje Rädensoat, äa flieekjen un lieejen. 14Brinj an en dien Oaja äwatsied; brinj dee en de Grunt bat dee nich mea doa sent. Dan woaren de Menschen weeten daut Gott äwa Jakob un äwa de gaunze Welt rejieet.
15Miene Fiend komen zeowes trigj, ranen derch de Staut un julen aus de Hunj. 16Dee ranen han un häa no waut to äten un grumsaujen, wan see nich saut woaren.
17Oba ekj woa von diene Krauft sinjen; ekj woa aule Morjen von diene truhoatje Leew sinjen; wiels du best mien Schutz un miene Tooflucht, wan ekj en Trubbel kom. 18Ekj well die, miene Krauft, derch sinjen lowen; wiels du, Gott, best mien Schutz un mien truhoatich leeftolja Gott.
Currently Selected:
Psalmen 59: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
