Psalmen 57

Eene niee Jewesheit

(Varzh 8-12: 108,2-6)

1Een goldnet Jeschenkj von David väatosinjen, von don aus hee nich omkjeem, aus hee sikj ver Saul en de Heel vestuak. #1Sam 22,1 2Hab Metleet met mie, oo Gott, hab Metleet met mie! Miene Seel velat sikj opp die, un ekj sieekj mie Schutz em Schauten unja diene Flichten, bat daut Ojjlekj vebie es. #Psa 17,8; 91,1-2 3Ekj woa Gott, dän Aulahechsten, aunroopen, dän Gott, dee met mienen Jaumastaunt een Enj moakt. 4Dee woat vom Himmel auntwuaten un mie raden. Hee woat dee toschaund moaken, dee opp mie romklunjen. Gott woat mie wiesen, woo tru un truhoatich leeftolich hee es. 5Ekj sie medden manke Leiws. Ekj ligj mank rietende Tieren, Menschen, dän äare Tänen Spiessen un Feilen sent, un äare Tungen, soo schoap aus Schwieed. 6Gott, lot de Velkja daut seenen daut du äwa aule Himmel steist, un diene Iea äwa de gaunze Welt.

7See stalden fa mie eene Faul em Footstich. Miene Seel es unjadrekjt; see groowen een Loch wua ekj go, un sent doa selfst nenn jefollen. 8Mien Hoat es reed, oo Gott, mien Hoat es reed von die to sinjen un die to lowen. #(8-12) Psa 108,2-6 9Wakj opp, miene Seel, wakj opp miene Hoap un Jittoa! Ekj woa de Morjensonn oppwakjen. 10Ekj woa die, oo Har, manke Velkja danken; ekj woa manke Menschen von die sinjen. 11Wiels diene truhoatje Leew es groot; dee rieekjt bat aule Himmel, un die es to vetruen, soo wiet aus de Wolkjen gonen. 12Gott, lot aul de Velkja daut seenen daut du äwa aule Himmel steist, un diene Iea äwa de gaunze Welt.

Currently Selected:

Psalmen 57: PB

Highlight

Compare

Copy