Psalmen 55

Vom Fient veroden

1Unjarecht von David, met Seidenspell väatosinjen. 2Gott, horch no mien Jebäd, un vestäakj die nich soo, daut du mien prachren nich hieescht. 3Horch no mie un auntwuat mie; horch woo zoagent ekj kloag un roa, 4wiels de Fient soo schricht, un de gottloosa drenjt. Dee brinjen lieden äwa mie, un benämen sikj fientlich en äaren Oaja. 5Mien Hoat es ennalich en Forcht, un Doodesangst es äwa mie jekomen. 6Ekj sie en Forcht un Zetren jeroden; mie haft eene grulende Angst unjajekjräajen. 7Ekj säd: Oo, wan ekj Flichten haud aus eene Duw, dan fluach ekj wajch, daut ekj Ru haud! 8Ekj wudd wiet wajch flieejen un en de Wiltnis bliewen. 9Ekj wudd mie spooden, daut ekj no mien Schulinjsplauz kjeem, wiet vom Wintstorm un Owwada.

10Har, schauf daut de gottloose sikj oneenich woaren, un vewerr an äare Sproak, wiels ekj hab jeseenen, woo ruchloos un oneenich dee en de Staut sent. 11Dee ranen Dach un Nacht han un häa opp de Wenj, un bennen haft schlajchtet un Trubbel Äwahaunt. 12Enne Grunt brinjen es doa tus, lieejen un hinjat Licht fieren nemt opp äare Gaussen kjeen Enj. 13Wan een Jäajna mie beleidjen wudd, daut kunn ekj vedroagen, ooda wan een Fient jäajen mie oppstunt, kunn ekj mie fa am vestäakjen. #(13-15) Psa 41,10 14Oba nu, best du daut, een Maun soo aus ekj, mien Kommarod, mien gooda Frint, 15met däm ekj scheene Jemeenschoft haud, aus wie toop nom Gotteshus jinjen. 16Lot dän Doot onverhofs äwa miene Fiend komen, lot dee läwendich em deepen Grauf nenn foaren, wiels daut Beese es en an un wont mank an. #4Mo 16,31-33

17Ekj oba roop Gott aun, un de Har woat mie halpen. 18Ekj woa zeowes, zemorjes un opp Meddach kloagen un lud truaren, un hee woat miene Stemm hieren. 19Hee haft miene Seel en Fräd ut dän Kjrich jerat, dee jäajen mie wia, wiels doa wieren väle opp miene Sied. 20Gott, dee eewich opp däm Troon sett, woat an hieren un em Älent steeten; wiels see nich endren, ferchten see Gott uk nich. #Psa 102,27-28 21Mien Kommarod jript siene Frind aun, un brakjt sienen Bunt met an. 22Siene Räd es glaut aus Botta, un doch haft hee Kjrich em Hoat; siene Wieed sent wieekja aus Eelj, un doch sent daut kole Schwieed. #Jer 9,7

23Laj diene Laust opp däm Harn; dee woat fa die sorjen un hee woat dän jerajchten niemols faulen loten. #1Pet 5,7 24Du oba, Gott, woascht de beese en daut deepe Grauf steeten, wua see omkomen. Dee waut Menschen ombrinjen un faulsch sent, woaren äa Läwen nich haulf utläwen. Ekj oba velot mie opp die. #Psa 102,25

Currently Selected:

Psalmen 55: PB

Highlight

Compare

Copy