Psalmen 50

Rechtich Gott deenen

1Een Asafs Psalm. De Aulmajchtja, Gott de Har, haft jerät un roopt de Welt, vom Sonnen Oppgank bat däm Sonnen Unjagank. #1Chr 25,1 2Ut Zion kjemt Gott sien scheena Glaunz väa. #Jes 62,1 3Ons Gott kjemt un es nich stell. Ver am es een frätendet Fia, un om am een jewaultja Storm. 4Hee roopt Himmel un Ieed doabie to sennen, wan hee sien Volkj rechten deit: #5Mo 32,1; Jes 1,2 5Saumelt mie aul miene heilje, dee biem Opfa een Bunt met mie jemoakt haben. #2Mo 24,4-11 6Lot dän Himmel väastalen, woo jerajcht hee es, wiels Gott selfst es Rechta.

7Horcht häa, mien Volkj, un ekj woa räden. Oo Israel, mien Zeichnis woat jäajen junt sennen. Ekj sie Gott, jun Gott! #2Mo 20,2 8Ekj näm junt nich väa, wäajen june Opfa; june Brauntopfa sent doch emma ver mie. #(8-13) Psa 40,7; 1Sam 15,22; Jes 1,11 9Ekj woa kjeen jungen Boll ut dien Staul aunnämen, uk kjeen Kosenbock ut diene Häad, 10wiels aule Tieren em Woolt un daut Vee bie de dusende opp de Boaj sent miene. 11Ekj kjan aule Väajel opp de Boaj, un aules, waut sikj opp de Stap bewäacht, es mient. 12Wan ekj hungrich wia, daut wudd ekj die nich sajen, wiels de Welt un aules waut doabennen es, es mient. 13Meest du daut ekj Fleesch von Bolles äten wull, un daut Bloot von Bakj drinkjen? 14Lot dien Dank een Opfa fa Gott sennen, un betol dän Hechsten waut du vesproaken hast; #Jona 2,10 15roop mie wan du en Noot kjemst. Ekj woa die raden, un du woascht mie ieren. #Psa 91,15

16Oba toom gottloosen sajcht Gott: Waut hast du fa rajcht, mien Jesaz to wadaholen, un von mienen Bunt to räden? #(16-21) Reema 2,21-23 17Du stalst die jäajen daut, waut ekj die jelieet hab, un schmitst miene Wieed hinja die. 18Wan du een Reiba sitst, ranst du met am met, un best en Jesalschoft met Ehebräakja. 19Du brukst dien Mul toom beeset räden, un diene Tung toom lieejen un hinjat Licht fieren. 20Du setst un rätst jäajen dienen Brooda, un ragst diene Mutta äaren Sän rauf. #(20 un 21) 1Mo 42,21 21Dit hast du jedonen, un ekj sie steljebläwen; du dochst ekj wudd krakjt soo sennen aus du. Oba nu woa ekj die doamet beschuljen un die daut jlikj ver de Uagen stalen.

22Jie, dee jie nich aun Gott denkjen, hoolt dit em Denkj, soo daut ekj junt nich met eemol ombrinj un doa kjeena sennen woat, junt to raden. 23Wäa mie een Dankopfa brinjt, ieet mie doaderch, un dee moakt dän Wajch reed, daut ekj am Gott siene Radunk wiesen kaun.

Currently Selected:

Psalmen 50: PB

Highlight

Compare

Copy