Psalmen 49

Daut Läwen es nich to kjeepen

1Een Psalmleet von Korach siene Säns, väatosinjen. 2Horcht no dit, aule Velkja, horcht emol aula häa, dee jie oppe Ieed läwen, 3auf läach ooda huach, auf rikj ooda oam, aulatoop! 4Mien Mul saul Weisheit räden, un em Hoat woa ekj doaräwa nodenkjen, om daut to vestonen. 5Ekj woa mien Ua hanhoolen een Spruch to hieren; un waut mien Rotsel bediet, woa ekj met Hoapenspell verendach brinjen.

6Wuarom sull ekj mie en beese Doag ferchten, wan miene Fiend met äare Gottloosichkjeit om mie sent, 7soogoa soone dee sikj opp äa Vemieejen, un met äaren grooten Rikjtum puchen? 8Doa es kjeena dee sienen Brooda bie Gott loosleesen kaun un daut Läwen raden kaun. #(8 un 9) Micha 6,6-8; Mat 16,26 9Wiels de Pries fa siene Seel es too huach; kjeena kaun jenuach tolen, 10daut hee eewich läft un nich en daut Grauf kjemt.

11Eena woat seenen, daut de weise Menschen stoawen, oba jrod soo motten Noaren un onveninftje uk stoawen, un äa goot fa aundre loten. #Liera 2,16; 6,2 12See haben fa sikj de Oppfotunk, daut an äare Hiesa emma bliewen woaren, un äare Wonstäd fa dee, dee no an komen. Dee haben äare Lenda opp äare ieejne Nomes. 13Oba eendoont woo huach een Mensch en Ieren steit, hee kaun nich bliewen; hee mott krakjt soo goot stoawen aus een Vee. #Liera 3,19

14Dit es dee äa vedoawen, dee sikj opp sikj selfst veloten, un uk äare Nokomen äat, dee daut goot heeten, waut see sajen. 15Dee woaren soo aus Schop em Grauf jelajcht, un de Doot es äa Hoad. Un wan de Morjen kjemt, woaren de Opprechtje äwa an rejieren, un äare Kjarpasch woaren em Grauf vekomen. 16Oba Gott woat miene Seel ut daut Grauf siene Jewault raden, un mie no sikj selfst nämen. #Psa 73,24; Hos 13,14

17Lot junt daut nich orruich moaken, wan aundre rikj woaren, un wan dee schmockere, jratre Hiesa haben. #Hiob 21,7-15 18Wiels wan dee stoawen, woaren see nuscht metnämen, un äa Rikjtum woat an nich hinjaraun foaren. #Liera 5,14; 1Tim 6,7 19Wan see sikj uk aus jesäajent aunsagen, em Läwen, un Menschen an lowden, wan see fa sikj selfst goodet deeden, #Luk 12,16-21; 16,19-31 20doawäajen foaren see doch doahan, wua äare Vodasch sent, un seenen daut Licht niemols mea. 21Kort soo, wan een Mensch en aunseenen steit, un von aulem nuscht vesteit, es hee soo aus een Vee, daut omkjemt.

Currently Selected:

Psalmen 49: PB

Highlight

Compare

Copy