Psalmen 46

Gott es bie ons

1Een Jugentleet von Korach siene Säns, väatosinjen. 2Gott es onse Tooflucht uk onse Krauft. Hee es eene jewenschte Help en groote Noot. 3Doawäajen woa wie ons nich ferchten, un wan de Welt sikj uk wudd omdreien un de Boaj em Mäa vesinkjen. 4Wan de Wotasch uk aunschwalen, ruzhen un schumen, daut de Boaj doavon schedren, doawäajen woa wie ons noch nich ferchten. 5Doa es een Stroom, to däm Gott siene Staut sikj freit; daut es de heilje Städ, wua de Aulahechsta wont. #Jes 12,3 6Gott es en dee Staut, doawäajen woat dee secha bliewen; Gott woat dee halpen, wan daut zemorjes aunfangt to doagen. 7De Velkja tooben un de Kjennichsrikjs faulen; de Ieed mott vegonen, wan hee sikj hieren lat. 8De Har, dee aules rejieet, es met ons; Jakob sien Gott es onse Tooflucht.

9Komt, bekjikjt emol dän Harn siene Woakjen un de Vestimlunk, dee hee oppe Ieed aunjerecht haft; #(9 un 10) 2Kjen 19,35 10dee en aule Welt met aulem Kjrich een Enj moakt; dee de Boages tweibrakjt un de Spiessen tweischleit un de Kjrichswoages met Fia vebrent. #Psa 76,4 11Siet stell un seet en, daut ekj Gott sie. Ekj woa manke Velkja jeieet woaren. Ekj woa oppe Ieed Aunerkjanunk haben. 12De Har, dee aules rejieet, es met ons; Jakob sien Gott es onse Tooflucht.

Currently Selected:

Psalmen 46: PB

Highlight

Compare

Copy