Psalmen 45

Fa däm Kjennich siene Kjast

1Aun dän Kualeida, no de Wies von de Roosen, een Brutleet von Korach siene Säns, väatosinjen. 2Mien Hoat deit een feinet Leet dichten; ekj well vom Kjennich sinjen; miene Tung es soo aus eenen gooden Schriewa siene Steft. 3Du best scheena aus aule Menschensäns, un du best een jeleifja Rädna, doawäajen haft Gott die opp emma jesäajent. 4Schnal die daut Schwieet aun diene Sied, du Jewaultja, en diene harliche Majestät! 5Die mott daut en diene Majestät jlekjen. Doawäajen bemieej die aulawäajen fa de Woarheit entostonen, un fa daut rajcht to strieden; dan woat diene rajchte Haunt Wunda utrechten. 6Diene Feilen sent schoap, daut de Velkja doavon ver die faulen; dee spekjen dän Kjennich siene Fiend en daut Hoat.

7Dien Troon, oo Gott, saul emma un eewich bliewen; du rejieescht rajcht, un daut es de Rejierungs Stock fa dien Kjennichrikj. 8Wiels du opp Jerajchtichkjeit helst, un Gottloosichkjeit nich lieden kaust, haft Gott, dien Gott, Freideneelj äwa die jegoten un die doaderch äwa diene Kommaroden jestalt. 9Diene Kjleeda rikjen no Mirren, Aloen un Kassia. Utem Paulaust met Aulfenbeen bekjleet, moakt daut Seidenspell die froo. 10Mank diene Bejleita sent Kjennichsdajchta; aun diene rajchte Sied steit de Brut met daut feinste Golt behongen.

11Horch, du Dochta, denkj doaräwa no un horch häa; vejat von dien Volkj un dien Vodahus. 12Dan woat de Kjennich diene Scheenheit jieren haben; wiels hee dien Har es, jeff am de Iea, dee am traft. 13De Dajchta von Tierus woaren met een Jeschenkj doa sennen; rikje Menschen woaren vesieekjen die to schmeichlen.

14De Kjennichsdochta em Paulaust es gaunz harlich; en äare Kjleeda sent goldne Dräd nenjesponnen. 15See saul en een Kjleet von väl Kalieren nom Kjennich jebrocht woaren. De Junkfrues äare Bejleita, dee met ar komen, woaren no die jebrocht woaren. 16Dee woaren froo un met Freiden nenn jeleit; dee gonen en dän Kjennich sien Paulaust nenn.

17Diene Säns woaren diene Vodasch äare Städ ennämen; un du woascht dee en aule Welt aus Prinsen aunstalen. 18Ekj woa doano seenen, daut diene Nokomen aun dienen Nomen denkjen woaren; doawäajen woaren de Menschen emma un eewich goot von die räden.

Currently Selected:

Psalmen 45: PB

Highlight

Copy

Compare