Psalmen 44

Von Gott vestat

1Een Unjarecht von Korach siene Säns, väatosinjen. 2Gott, wie haben met onse ieejne Uaren jehieet, waut onse Vodasch ons vetalt haben, daut du en äare Doag grootet jedonen hast; #5Mo 6,20-25 3woo du de Velkja met diene Haunt utem Launt jedräwen, un onse Vodasch doa nenjebrocht hast; un dee vemieeden sikj doabennen, wiels du een Jefaulen aun an hautst. 4Daut wia nich derch äa Schwieet, daut see daut Launt jewonnen. Un daut wia nich äa Oarm, dee an de Äwahaunt brocht; daut wia diene rajchte Haunt, dien Oarm, un dien frinteljet Jesecht, wiels du an goot wieescht.

5Du, Gott, best mien Kjennich dee Jakob de Äwahaunt jäwen woat. Du, Gott, best mien Gott un Kjennich, dee sikj väajenomen haud Jakob de Auntwuat to jäwen. 6Derch die driew wie onse Fiend trigj; derch dienen Nomen klunj wie opp onse Fiend rom. 7Ekj velot mie nich opp mien Boagen, un mien Schwieet kaun mie nich halpen; 8Du moakst dee toschaund, dee ons nich lieden kjennen. Du halpst ons onse Fiend loostowoaren. 9Von Gott räd wie dän dachäwa goodet, un lowen dienen Nomen eewich. #Jer 9,22-23

10Oba du hast ons vestat un toschaund jemoakt; du best em Kjrich nich mea opp onse Sied. 11Du muakst ons trigjtrakjen fa onse Fiend, un dee waut ons nich lieden kjennen, haben ons bestolen. 12Du hast ons hanjejäft aus Schlachtschop, un hast ons manke Velkja vestreit. 13Du hast dien Volkj fa een Hungaloon vekoft, wuaderch du nuscht jewonnen hast. 14Onse Nobavelkja seenen daut wie toom Spott jeworden sent, un see haben äaren Spott un Spos äwa ons. #1Kjen 9,7; Psa 79,4 15Mie steit daut aule Dach väa, daut ekj miene Nobasch äa Fient jeworden sie, daut ekj nich en Jnoden sto, un toschaund jeworden sie. 16Ekj mott mie aule Dach doamet schämen, daut ekj miene Fiend unjaligjen mott, 17wan ekj dee hia, dee mie Schaund un Spott toosaten, un miene rachjieeje Fiend seenen mott.

18Aul dit es äwa ons jekomen un doch hab wie die nich vejäten, un sent dienen Bunt uk nich ontru jeworden. 19Ons Hoat wia nich aufjefollen, un wie wieren uk nich von diene Wäaj aufjekomen, 20daut du ons manke wille Hunj loten must, un ons em diestren hoolen must. 21Wan wie onsen Gott sienen Nomen vejäten hauden, ooda onse Henj utjestrakjt hauden no een aundren Gott, 22wudd Gott daut nich sennen enjeworden? Hee kjant je daut Hoat bat opp däm Grunt. 23Daut es om dient haulwen daut wie dän Doot emma ver ons haben, un aus Schlachtschop aunjeseenen woaren. #1Kor 15,31; Reema 8,36

24Wakj opp, oo Har, wuarom schlapst du? Sie waka, un vesteet ons nich opp emma. 25Wuarom vestakjst du die, un vejatst daut wie en ons Älent unjadrekjt woaren? 26Wiels onse Seel es em Stoff vesunken. Onse Kjarpa ligjen opp de Ieed, un kjennen nich oppstonen. 27Sto opp un halp ons! Halp ons, wiels diene Leew nienich nolat.

Currently Selected:

Psalmen 44: PB

Highlight

Copy

Compare