Psalmen 38

Unja Druck von Krankheit un Schult

1Eent von David siene Psalmen fa een Dankopfa. 2Har, strof mie nich en dien Oaja, un wies mie nich trajcht, bat diene Wutt sikj jelajcht haft. 3Wiels diene Feilen sent deep en mie nenn jefoaren, un diene Haunt drekjt mie. #Hiob 6,4

4Wiels du soo veoajat best, sie ekj gaunz un goa krank; un wäajen miene Sind es doa nuscht kjoanjet en mien Kjarpa. 5Ekj sie bat äwa mienen Kopp en Sinden; #Kloag 1,14 6Wiels ekj soo schoslich jehaundelt hab, sent miene Wunden stenkjrich un kjietrich jeworden. 7Ekj go kromm un jebekjt, un go dän dachäwa truarich. 8Mie brennen miene Lenjen; doa es nuscht jesundet en mie. 9Ekj sie vestat un doljedrekjt; mien Hoat es soo orruich, daut ekj stänen mott.

10Har, du weetst om aules waut ekj haben mucht, un ekj sie met mien stänen nich jeheem. 11Mien Hoat klopt, un miene Krauft haft mie veloten; ekj hab soogoa mien Uagenlicht veloaren. 12Miene Frind un Nobasch gonen mie wäajen miene Ploag utem Wäaj, un miene Aunjehieeje stonen wiet auf. #Hiob 19,13-19; Psa 69,9; 88,9 13Dee, waut mie nom Läwen stonen, lajen äare Schlenj fa mie; dee mie schoden wellen, räden von en de Grunt brinjen, un plonen emma met Lest omtogonen. 14Ekj sie soo aus een doowa Mensch, dee nich hieren kaun, un soo aus een stomma, dee nich räden kaun. #Psa 39,3 15Ekj sie soo jeworden aus een Mensch, dee nich hieren kaun, un doawäajen nich auntwuaten kaun. 16Ekj oba lua no die, oo Har. Du, oo Har un Gott, woascht auntwuaten. 17Wiels ekj säd: Lot dee sikj nich äwa mie freien, ooda sikj waut meenen, wan mie de Feet jleppen. 18Wiels ekj sie bat däm faulen jekomen, un mie deit daut emma irjentwua wee.

19Ekj bekjan miene Sind un ekj sie beduat wäajen miene Sind. #Psa 32,5 20Oba miene Fiend läwen un sent stoakj; un dee mie onen Uasoak nich lieden kjennen, woaren emma mea. 21Dee, dee mie beeset trigjtolen, wan ekj an goodet doo, spotten äwa mie, wiels ekj daut goode no go. 22Velot mie nich, oo Har! Sie nich wiet auf von mie, oo mien Gott! 23Komm mie schwind halpen, oo Har, mien Heilant!

Currently Selected:

Psalmen 38: PB

Highlight

Copy

Compare