Psalmen 37

Erfoarungen von eenem Läwen met Gott

1Eent von David siene Psalmen. Oaja die nich äwa de beese, un sie du nich aufjenstich äwa dee, dee orrajcht doonen. #Spr 24,19 2Wiels dee woaren soo aus daut jreene Graus vedrieejen. 3Vetru dän Harn un doo goodet; dan woascht du em Launt wonen un secha sennen. 4Hab diene Freid aum Harn; dee woat die jäwen, waut dien Hoat sikj wenscht. #Psa 20,5 5Jeff die dän Harn han, un velot die opp am, un dee woat daut goot moaken, 6un woat diene Jerajchtichkjeit verendach brinjen, soo aus daut Licht, un dien rajcht, soo aus de Meddach Sonn. #Micha 7,9 7Sie ruich em Harn, un lua jeduldich no am; un oaja die nich wan aundre en äare Wäaj jlekj haben, ooda äwa dee, dee äare beese Plons derchfieren. 8Siet nich bossich un woat nich doll; oajat junt nich, wiels daut moakt dän Schoden bloos jrata. 9Wiels de beese woaren utjerot, oba dee waut ruich nom Harn luaren, woaren daut Launt oawen. 10Daut woat nich mea lang dieren, dan woaren de gottloose nich mea sennen, un wan du no äaren Plauz sieekjen woascht, woascht du an nich finjen. 11Oba de deemootje woaren daut Launt oawen, un sikj to de groote Fräd freien. #Mat 5,5

12De gottloosa plont schlajchtet jäajen dän jerajchten, un kjnirscht met de Tänen äwa am. 13De Har lacht äwa am, wiels hee sitt daut sien Dach kjemt. #Hiob 18,20 14De gottloosa haft sien Schwieet reed un sien Boagen oppjetrocken, de oame un betrofne doltoschlonen, un de fromme auftoschlachten. 15Oba äa Schwieet woat en äa ieejnet Hoat nenn foaren, un äa Boagen tweijebroaken woaren.

16Daut Weinje waut een jerajchta haft, es bäta aus väle gottloose äa grootet Goot. #Spr 15,16 17Wiels dän gottloosen woat de Oarm jebroaken woaren, oba de jerajchte bewoat de Har. 18De Har es met de jerajchte äare Doag bekaunt, un äa Oafgoot saul eewich sennen. #Liera 8,12 19See woaren en beese Tieden nich toschaund woaren, un wan eene Hungaschnoot kjemt, woaren see jenuach haben. #Spr 10,3 20Oba de gottloose woaren omkomen; uk wan däm Harn siene Fiend soo sent aus eene schmocke jreene Weid, woaren dee veschwinjen, soo aus de Ruak veschwinjt.

21De gottloosa borcht un tolt daut nich trigj; de jerajchta oba haft Metleet un jeft. 22Wiels dee, dee derch am jesäajent woaren, oawen daut Launt, oba dee, dee hee veflucht woaren utjerot. 23Een gooden Maun sien Gank es vom Harn jesechat, un de Har freit sikj to sienen Wajch. 24Un wan hee uk felt, soo felt hee nich lank han, wiels de Har helt am met siene Haunt. #Spr 24,16

25Ekj sie junk jewast un sie nu oolt, oba hab noch niemols jeseenen daut de jerajchta veloten es, ooda siene Kjinja no Broot prachren. 26Hee es dän dachäwa mildjäwrich un liet, un siene Kjinja woaren jesäajent sennen. 27Bliew vom beesen wajch un doo goodet, soo blifst du hia emma wonen. 28De Har räakjent jerajcht sennen sea väl un woat siene heilje nich veloten; dee woat hee emma bewoaren, oba de gottloose äare Nokomen woaren utjerot. 29De jerajchte woaren daut Launt oawen un eewich doabennen bliewen. #Jes 60,21

30Ut de jerajchte äa Mul kjemt Weisheit, un siene Tung rät waut rajcht es. 31Hee haft sien Gott sien Jesaz em Hoat, un hee jlept nich wan hee jeit. 32De gottloose ligjen opp de Lua, un vesieekjen de jerajchte omtobrinjen. 33Oba de Har woat an dee nich en de Henj jäwen, un uk nich veuadeelen loten, wan dee jerecht woaren. 34Bliew jeduldich opp däm Harn sien Wajch; dan woat hee die wieet achten daut Launt to oawen; du woascht seenen, daut de gottloose utjerot woaren.

35Ekj hab een trozjen gottloosen Maun jeseenen, dee sikj utbreed un blieejd aus een Zeedaboom. #(35 un 36) 1Sam 25,2-38; Hes 31,3-14 36Un aus ekj doa wada vebie jinkj, wia dee doa nich mea; ekj socht noch no am, oba dee wia nich to finjen. 37Moakj die dän oschuldjen Maun, un kjikj no dän opprechtjen, wiels dee woat gooden Erfolch haben. 38Oba de Sinda woaren aultomol omjebrocht woaren, un de gottloose woaren tolatst utjerot woaren. 39Oba de jerajchte äare Radunk kjemt vom Harn. Hee es äare Krauft, wan see en Trubbel sent. 40De Har woat an biestonen un raden; hee halpt dee von de gottloose loos to komen, wiels see sikj opp am veloten. #Luk 18,7-8

Currently Selected:

Psalmen 37: PB

Highlight

Copy

Compare