Psalmen 36

Woo schlajcht de Menschen sent un woo goot Gott es

1Een Psalm von David, dän Harn sien Deena, väatosinjen. 2De Sind rät bestendich en däm gottloosen sien Hoat. Hee kaun nich seenen, wuarom hee Gott ferchten saul. #Reema 3,18 3Hee helt soo väl von sikj selfst, daut hee jleeft siene Sind kaun nich utjefungen un vestat woaren. 4Waut hee rät es faulsch un jeloagen; hee haft oppjehieet weis to sennen un goodet to doonen. 5Soogoa em Bad plont hee beeset, un jeft sikj een sindjen Wajch han; hee lat sikj uk nich trajchtwiesen goodet to doonen. #Micha 2,1

6Oba diene truhoatje Leew, oo Har, rieekjt bat aum Himmel, un diene Woarheit, soo wiet aus de Wolkjen gonen. 7Diene Jerajchtichkjeit es soo aus Gott siene Boaj, un diene Jerechten, soo aus daut groote deepe Mäa. Un du, oo Har, halpst Menschen un Vee. 8Daut es väl wieet daut du soo leeftolich best; de Menschenkjinja komen bie die unja de Flichten em Schauten stonen. #Psa 17,8 9Dee erjazen sikj aun dän gooden Väarot en dien Hus, un du jefst an von dän Stroom to drinkjen, dee die jefelt. 10Wiels du best dee, von däm aulet Läwen kjemt; en dien Licht see wie daut Licht. #Jer 2,13; Joh 4,14

11Oo bliew met diene truhoatje Leew bie dee, dee die kjanen, un bliew met diene Jerajchtichkjeit, bie dee, dee em Hoat opprechtich sent. 12Lot de stolte mie nich unja de Feet kjrieen, un lot mie nich von gottloose Haunt wajch jejoacht woaren. 13See woo de beese jefollen ligjen, dee sent doljeschmäten un kjennen nich opp.

Currently Selected:

Psalmen 36: PB

Highlight

Copy

Compare