Psalmen 31

Ekj velot mie opp Die, Har!

1Eent von David siene Psalmen, väatosinjen. 2Har, ekj velot mie opp die, lot mie niemols toschaund woaren; rad mie derch diene Jerajchtichkjeit. 3Horch no mie un halp mie schwind! Sie du fa mie een Toofluchtsteen, eene vesechade Staut, stoakj jenuach mie to raden. #(3 un 4) Psa 71,3 4Wiels du miene Tooflucht un mien vekrup Steen best, doo mie om dienen Nomen haulwen leiden un trajchtwiesen. 5Lot mie nich en de Faul nenn komen, dee see heemlich fa mie jestalt haben. Bie die finj ekj Schutz. 6En diene Henj befäl ekj mienen Jeist; du hast mie jerat, Har, du trua Gott. #Luk 23,46

7Ekj kaun dee nich vedroagen, dee sikj aun nuzloose Aufjetta hoolen; ekj hab mien vetruen em Harn. 8Ekj woa froo sennen un mie to diene truhoatje Leew freien, daut du mien Älent aunsitst un opp miene Seel äare Noot achten deist, 9un hast mie nich miene Fiend en de Henj komen loten; du hast miene Feet väl Rum jejäft.

10Hab Metleet met mie, oo Har, wiels ekj sie en Trubbel. Miene Uagen woaren schwak von Trua, un soo uk miene Seel un mien Kjarpa. 11Mien Läwen es vekjart derch Trua, un miene Joaren sent derch hielen weinja jeworden. Miene Krauft haft derch aul mien Älent vesajcht, un miene Been sent schwak jeworden. 12Aul miene Fiend haben daut soo wiet jebrocht, daut ekj en de Nobaschoft veacht woa, un sie een Aufschu fa miene Frind jeworden; wäa mie opp de Gaus traft, sitt daut hee von mie wajch kjemt. 13Ekj sie von an vejäten aus wan ekj doot wia; ekj sie soo aus een tweijeschloagnet Jefäs. 14Ekj hia väle äa veachtendet Jepluda. Ekj woa von aule Sieden jeenjst. Aus see berooden, waut met mie to doonen, plonden see mie doottomoaken. #Jer 20,3

15Oba Har, ekj velot mie opp die; ekj saj noch emma: Du best mien Gott! 16Miene Tiet es en diene Henj. Rad mie ut miene Fiend äare Henj, un von dee, dee mie nostonen. #Psa 139,16; Liera 3,1-8 17Kjikj dienen Kjnajcht frintlich aun; leeftolja Gott, rad mie. #4Mo 6,25; Psa 80,4 18Har, lot mie nich toschaund woaren, wiels ekj roopt die aun. Lot de gottloose toschaund woaren, un lot dee em Grauf stell sennen. 19Lot de Lieeja daut Mul toohoolen, dee doa huachkoppich, stolt un veachtent jäajen de jerajchte räden.

20Woo groot es doch aul daut goode waut du fa dee reed hast, dee die ferchten. Aulemaun weet woo goot du best un woo secha du dee helst, dee äa vetruen opp die saten. 21Du helst dee ver die secha fa Menschen äare Aunschläaj; du jefst an en diene Woninj Schutz jäajen dee, dee an faulsch beschuljen. #Psa 27,5

22Loft dän Harn, wiels hee bewees mie siene truhoatje Leew, aus ekj en eene beloagade Staut wia. 23Aus ekj vezoacht wia, säd ekj: Du kaust mie nich mea seenen. Oba du hieezhd mie, aus ekj om Help schrieech.

24Siet dän Harn goot, aul jie siene heilje! Dee, dee am tru bliewen, bewoat de Har, oba de stolte kjrieen äare volle Strof. 25Siet stoakj un von Hoaten mootich, aul jie dee june Hopninj em Harn haben!

Currently Selected:

Psalmen 31: PB

Highlight

Copy

Compare