Psalmen 30

Du hast mie daut Läwen vom nieen jeschonken

1Eent von David siene Psalmen, bie de Tempel Enweiunk to sinjen. 2Har, ekj well die huach häwen, wiels du hast mie jeheelt, un leetst miene Fiend sikj nich äwa mie freien. 3Har, mien Gott, aus ekj no die om Help schrieech, muakst du mie jesunt. #2Mo 15,26 4Har, du hast miene Seel veschoont un mie aum läwen jehoolen, daut ekj nich en daut Grauf brukt. #Psa 116,3-4.7-9

5Sinjt fa am, jie siene heilje; loft sienen heiljen Nomen. 6Wiels sien Oaja es mau fa een Uagenblekj, oba siene Jnod es fa Läwestiet. Ekj mach de Nacht äwa hielen, oba zemorjes kjemt wada Freid. #Jes 54,7-8

7Ekj oba säd, don aus mie daut goot jinkj: Ekj woa niemols mea unjaligjen. 8Oo Har, derch dien jefaulen aun mie, hautst du mienen Boajch stoakj jemoakt. Oba aus du die vestuakst, wia mie angst. 9Dan roopt ekj die, Har, un fruach no diene Help. 10Waut es en mien Doot fa een Jewenst, wan ekj em Grauf ligj? Woat de Stoff die lowen, un woat dee doavon räden, woo tru du best? #Psa 6,6 11Horch, oo Har, un hab Metleet met mie! Oo Har, sie du mien Helpa!

12Du hast mie mien kloagen jenomen, un en de Städ mie jemoakt met Freid to sinjen. Du hast mie miene Truakjleeda utjetrocken un mie met Freidenkjleeda jekjleet, 13daut mien Hoat die sinjent lowen kaun un nich stell bliewen. Oo Har, mien Gott, ekj well die eewich danken.

Currently Selected:

Psalmen 30: PB

Highlight

Copy

Compare