Psalmen 27
27
Bie Gott em Vekrup
1Eent von David siene Psalmen. De Har es mien Licht un miene Radunk; fa wäm sull ekj mie ferchten! De Har es miene Läwenskrauft en dee ekj secha sto; fa wäm sull ekj mie enjsten! #Micha 7,8; Psa 56,5 2Aus de Beese sikj äwahäa muaken, mie en de Grunt to brinjen, randen see sikj faust un follen. 3Un wan mie eene Armee äwafaulen wudd, doawäajen wudd mien Hoat sikj nich ferchten. Un wan jäajen mie wudd Kjrich utbräakjen, wudd ekj mie uk dan opp die veloten. #Psa 3,7
4Doa es eent om daut ekj dän Harn bedd, waut ekj jieren haben mucht, daut es daut ekj mien gaunzet Läwen en Gott sien Hus bliewen kunn, om to seenen woo harlich de Har es, un am en sienen Tempel to sieekjen. #Psa 26,8; 42,5; 63,3; 84,4-5.11 5Wan ekj en Trubbel kom, woat hee mie en siene Woninj secha hoolen; hee woat mie en sien Zelt vestäakjen, un mie opp een huagen Steen secha stalen. #Psa 31,21 6Dan woat mien Kopp huach äwa miene Fiend, dee rom mie sent, jehowen woaren; doawäajen woa ekj am en sien Zelt, met Freid, Opfa brinjen, am lowen un Dankleeda sinjen.
7 Har, hia mie wan ekj lud schrie, hab Metleet met mie un jeff mie eene Auntwuat. 8Aus du sätst: Komt sieekjt mie! säd mien Hoat to die: Die woa ekj mie sieekjen. #5Mo 4,29 9Dan vestäakj dien Jesecht uk nich fa mie. Schekj dienen Deena nich em Oaja trigj. Du wieescht je mien Helpa, dan steet mie nich trigj, un velot mie nich, oo Gott mien Rada! 10Wan mien Voda un miene Mutta mie uk veloten, de Har woat sikj mie aunnämen.
11 Har, wies mie dän rajchten Wajch, un leid mie opp eene jlikje Bon, wiels miene Fiend rom mie sent. #Psa 86,11; 139,24 12Jeff mie nich äwa no miene Fiend äaren Wellen, wiels dee beschuljen mie met Dinja, dee ekj niemols jedonen hab, un plonen mie to kjwälen. 13Ekj jleew oba doch, daut ekj daut goode vom Harn noch hia en de Läwendje äa Launt seenen woa. #Jes 38,11 14Räakjen met dän Harn! Sie stoakj un von Hoaten mootich, un räakjen met dän Harn!
Currently Selected:
Psalmen 27: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
