Psalmen 25
25
Vejeff mie miene Schult
1Eent von David siene Psalmen. Mien velangen, Har, es die auntobäden. 2Mien Gott, mien vetruen es opp die; lot mie nich toschaund woaren, daut miene Fiend sikj nich äwa mie freien. 3Wiels wäa met die räakjent, woat niemols toschaund woaren; oba dee doa onen Uasoak veachten, woaren toschaund woaren.
4 Har, wies mie diene Wäaj, un woont diene Stieej sent. 5Leid mie en diene Woarheit un belia mie! Wiels du best dee Gott, dee mie halpt; ekj räakjen aule Dach met die. 6Har, denkj aun dien Metleet un aun diene truhoatje Leew, wiels dee sent aul von oole Tieden häa. 7Denkj nich aun de Sinden en miene Jugent, un aun miene wadaspanstje Wäaj; oba denkj aun mie en diene truhoatje Leew, wiels du soo goot best. 8De Har es wundaboa goot un jerajcht, doawäajen wiest hee de Sinda trajcht opp däm Wajch. 9De deemootje halpt hee daut rajchte to finjen, un lieet dee sienen Wajch. 10Dän Harn siene Wäaj sent aula truhoatje Leew un Woarheit, fa dee, dee daut doonen waut sien Bunt velangt. 11Har, om dienen Nomen to ieren, vejeff mie miene groote Sind. #2Mo 34,6-7
12Wäa es dan dee Maun, dee dän Harn fercht? Däm woat hee dän Wajch wiesen, dän hee wälen saul. 13Siene Seel woat doa wonen, wua daut goot es, un siene Kjinja woat daut Launt jehieren. #Psa 37,9 14De Har haft een vetruen opp dee, dee am ferchten; dee woat hee sienen Bunt wiesen. 15Ekj hool dän Harn emma em Uag, wiels hee woat miene Feet ut de Schlenj nämen.
16Komm no mie un lot mie diene Jnod seenen, wiels ekj sie eensom un em Älent. 17Ekj hab groote Angst em Hoat; brinj mie ut miene Veläajenheit! 18See emol mien Jauma un Älent, un nemm mie aul miene Sinden auf. 19Kjikj no miene väle Fiend, un woo schlajcht dee mie lieden kjennen. #Psa 35,19 20Bewoa miene Seel un rad mie, lot mie nich toschaund woaren, wiels ekj velot mie opp die. 21Lot mie derch goot un opprechtich sennen bewoat bliewen, wiels ekj räakjen met die. 22Gott, rad Israel ut aul äare Noot! #Psa 130,8
Currently Selected:
Psalmen 25: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
