Psalmen 21

Dän Kjennich siene Freid

1Eent von David siene Psalmen, väatosinjen. 2Oo Har, de Kjennich freit sikj en diene Krauft, un woo es hee doch soo froo, daut du am halpst! 3Du hast am jejäft, waut sien Hoat velangt, un nich trigjehoolen, wuano siene Leppen fruagen. #Psa 20,5; 37,4 4Du kjemst am met groote Säajnungen entjäajen un satst am eene Kroon von reinem Golt opp däm Kopp. 5Hee fruach die no Läwen, un du jeefst am daut, langet Läwen opp emma un eewich. #Psa 61,7 6Hee es derch diene groote Help sea jeieet. Du hast groossoatje Harlichkjeit äwa am jesat. 7Secha hast du am eewje Säajnungen tookomen loten un am met diene Jäajenwuat froo jemoakt.

8De Kjennich velat sikj opp däm Harn, un derch dän Aulahechsten siene truhoatje Leew woat hee fauststonen. 9Diene Haunt woat aul diene Fiend to hoolen kjrieen; diene rajchte woat utfinjen, wäa dee sent, dee die fientlich jesonnen sent. 10Wan du komen woascht, woascht du dee soo moaken aus een flaumenda Owen; de Har woat dee en sienen Oaja ombrinjen, un Fia woat dee oppfräten. 11Du woascht dee met Kjinja toop ombrinjen un äwatsied schaufen. 12See plonden die Schoden auntodoonen, oba see woaren äare Aunschläaj nich kjennen derchfieren. #Jes 8,10 13See woaren die dän Rigjen dreien, wan du met däm utjerakjten Boagen no äare Jesechta zielen woascht.

14 Har, veharlich du die selfst en diene ieejne Krauft. Wie woaren diene Krauft besinjen un lowen.

Currently Selected:

Psalmen 21: PB

Highlight

Copy

Compare