Psalmen 22

Ut de Wiltnis jerat

1Eent von David siene Psalmen, väatosinjen; no de Wies: De Reekoo, dee tiedich jejäajat wort. 2Mien Gott, mien Gott, wuarom hast du mie veloten? Wuarom blifst du met diene Help soo wiet auf un horchst nich no mien stänen? 3Oo mien Gott, ekj schrie aule Dach, oba du auntwuatst mie nich; uk de Nacht, un finj kjeene Ru. 4Un doch best du jekjreent aus de Heilja; du best dee, dän Israel loft. 5Onse Vodasch saden äa vetruen opp die; see vetruden die un du holpst an. 6See schrieejen no die un worden jerat; see veleeten sikj opp die un worden nich toschaund. #Psa 25,2-3 7Oba ekj sie een Worm un nich een Mensch, een Spott unja de Menschen un vom Volkj veacht. #Hiob 25,6; Jes 41,14 8Wäaemma mie sitt, spott äwa mie. See moaken dikjlepje Faksen un schedren met de Kjap un sajen: #Hiob 16,10 9Hee veleet sikj opp däm Harn, dan lot däm am nu halpen. Wiels de Har siene Lost aun am haft, dan lot am nu raden.

10Un doch brochst du mie utem Muttalief; du schaufst en mie een vetruen, aus ekj noch aun de Muttabrosten lach. 11Ekj wia von Jeburt aun von die aufhenjich; du best von Jeburt aun mien Gott jewast. 12Sie nich wiet auf von mie, wiels Trubbel es dicht bie, un hia es kjeena mie to halpen.

13Miene Fiend sent om mie aus eene Häad Bolles. Jewaultje Bolles sent runtom mie. 14See rieten äare Frät op no mie aus een rietenda, brellenda Leiw. 15Ekj sie utjegoten aus Wota, miene Knoakes sent aula utem Jelenkj; mien Hoat es en mie aus jeschmoltna Waus. 16Miene Krauft es soo aus drieeje Schoawels, un de Tung bakt mie aum Bän aun; du hast mie fa doot em Stoff jelajcht. #Joh 19,28 17De Hunj sent bie mie omhäa, un eene gottloose Baund es runtom mie; dee haben mie derch de Henj un Feet jespekjt. #Joh 20,25.27 18Ekj kaun miene Knoakes aula talen; see glotzen no mie un seenen äare Lost aun mie. 19See deelen sikj miene Kjleeda en, un lossen mienen Äwarock ut. #Joh 19,24

20Oba du Har, sie nich wiet auf von mie; du best miene Krauft, komm schwind un halp mie! 21Rad miene Seel vom Schwieet, mien Läwen ut de Hunj äare Jewault! 22Halp mie ut dän Leiw siene Frät rut, un dän willen Boll von de Hieena to komen! Har, du hast mie jeauntwuat. #Dan 6,23

23Ekj woa miene Breeda dienen Nomen prädjen un die en de Jemeent sinjent lowen. #Psa 26,12; Heb 2,12 24Jie, dee dän Harn ferchten, loft am; aul jie dee von Jakob staumen, veharlicht am, un fercht am, aul jie dee von Israel staumen. 25Hee haft de oame äa Älent nich veacht, un sikj nich aufschuent von an trigjetrocken, un aus see am aunschrieejen hieed hee an. #Heb 5,7

26 Har, die well ekj en de groote Vesaumlunk lowen; ekj woa mien Vespräakjen hoolen ver dee, dee die ferchten. 27De oame sellen äten un saut woaren; dee dän Harn sieekjen woaren am lowen; muchten dee lang un jlekjlich läwen. #Psa 69,33 28De gaunze Welt woat doaraun denkjen un sikj nom Harn dreien, un ut aule Velkja sellen aule Famieljes die aunbäden. 29Wiels daut Rikj es dän Harn sient, un hee rejieet äwa de Velkja. 30Aul dee, dee goot auf sent opp de Ieed, woaren aunbäden; ver am woaren aule stoafliche Menschen äare Kjneeen bieejen, un uk dee, dee hia soo kjemmalich läwen. 31De Har woat Nokomen haben, dee am deenen; vom Harn woat to Kjint un Grootkjint jerät woaren. 32See woaren komen un siene Jerajchtichkjeit, un waut hee jedonen haft, to een Volkj prädjen, daut noch nich jebuaren es.

Currently Selected:

Psalmen 22: PB

Highlight

Copy

Compare