Psalmen 147

147

Gott siene Macht en de Natua un en de Jeschicht

1Loft dän Harn! Woo goot es daut doch, onsen Gott lowen; woo scheen un aunjebrocht, am to lowen. #Psa 92,2

2De Har but Jerusalem opp un saumelt de veschlapte Israeliten. 3Hee heelt, dee een jebroaknet Hoat haben; hee bebinjt an äare Wunden. #Jes 61,1 4Hee talt de Stierns un nant dee aula biem Nomen. #Jes 40,26 5Ons Har es groot un jewaultich stoakj. Sien Vestentnis haft kjeene Jrensen. 6De Har häft de unjadrekjte opp, oba brinjt de gottloose en de Grunt. #Luk 1,52

7Sinjt Dankleeda, dän Harn to lowen, loft am met sinjen un Hoapenspell. 8Hee bedakjt dän Himmel met Wolkjen un vesorcht de Ieed met Räajen un lat daut Graus opp de Boaj waussen. 9Hee vesorcht daut Vee met Fooda, un uk de junge Kraujen, wan dee doano schrieen. #Hiob 38,41 10Hee haft siene Lost nich en de Pieed äare Krauft, un haft siene Freid uk nich aun een Maun siene stoakje Been. 11De Har haft siene Freid aun dee, dee am ferchten, dee äare Hopninj en siene truhoatje Leew haben.

12Low dän Harn, oo Jerusalem; low dien Gott, oo Zion, 13wiels hee moakt diene Puatstangen stoakj, un säajent dee, waut en de Staut wonen. 14Hee moakt Fräd en diene Jrensen, un lat junt vom basten Weit saut äten. 15Hee ordent de Ieed aun, waut see doonen saul, un sien Wuat vebreet sikj sea schwind. #(15-18) Hiob 38,22-30 16Hee spreet dän Schnee soo aus Woll, un streit dän Frost soo aus Ausch. 17Hee schmitt sien Hoagel rauf soo aus Steenakjes. Wäa kaun siene iesendje Kold vedroagen? 18Hee sajcht bloos een Wuat, dan veschmelten dee; hee moakt sienen Wint weien, dan rant daut Wota. 19Hee haft Jakob sien Wuat openboat, un Israel siene Jesazen un Väaschreften jejäft. #(19 un 20) 5Mo 4,8; Apost 14,16; Reema 3,2 20Dit haft hee fa kjeen aundret Volkj jedonen; dee kjanen siene Jesazen nich. Haleluja!

Currently Selected:

Psalmen 147: PB

Highlight

Compare

Copy