Psalmen 146

146

Gott es daut, dee de schwake beschizt

1Low dän Harn, oo miene Seel, low dän Harn! 2Ekj woa dän Harn lowen, soo lang aus ekj läw, un mienen Gott met Leeda lowen, soo lang aus ekj hia sie. 3Velot junt nich opp Aumtslied; daut sent mau Menschen un kjennen nich halpen. #Psa 118,8-9; Jer 17,5 4Wan äa Jeist an velat, woaren see wada Ieed, un krakjt dan es daut met aul äa Väanämen jewast. #1Mo 3,19; Liera 3,20

5Jesäajent sent, dee Jakob sienen Gott aus äare Help haben, dee äare Hopninj en Gott dän Harn haben, #Jer 17,7 6dee Himmel un Ieed jemoakt haft, uk daut Mäa un aules waut doabennen es, dän Harn, dee eewich tru blift, 7dee no de unjadrekjte äa rajcht sitt, un de oame to äten jeft un de faustjenomne frie lat. 8De Har moakt de blinje seenen, de Har recht de unjadrekjte opp. De Har es de jerajchte goot. #Psa 145,14 9De Har woakt äwa de framde, un sorcht fa de Weisen un Wätfrues, oba vestieet de gottloose äaren Wajch. #2Mo 22,20-21

10De Har woat eewich rejieren. Oo Zion, dien Gott es Kjennich von Jennerazion bat Jennerazion. Loft dän Harn! #Psa 93,1

Currently Selected:

Psalmen 146: PB

Highlight

Compare

Copy