Psalmen 145

145

Gott siene truhoatje Leew

1Een Psalm von David, sienen Gott to lowen. Ekj woa die lowen, mien Gott, oo Kjennich, un emma un eewich dienen Nomen lowen. 2Ekj well die aule Dach säajnen un emma un eewich dienen Nomen lowen. 3De Har es groot un sull opp daut aulahechste jeloft woaren. Woo groot hee es, kaun kjeena utspräakjen. 4Eene Jennerazion no de aundre woat diene Woakjen väalowen; dee woaren von diene jewaultje Woakjen räden. 5Ekj woa äwa diene harlich scheene Pracht un äwa diene Wundawoakjen nodenkjen. #Psa 19,2-7 6Dee woaren aula von dee Krauft un diene Wundawoakjen räden, un ekj woa vetalen waut du grootet jedonen hast. 7Dee sellen doafäa sorjen, daut et niemols vejäten woat, woo goot du best, un met Freid sinjen, von woo jerajcht du best.

8De Har es voll Jnod un Metleet, sea jeduldich un rikj aun truhoatje Leew. #2Mo 34,6 9De Har es to aulem goot, un sien Metleet rieekjt äwa aules, waut hee jemoakt haft. #(9 un 10) Jes 64,7 10Aul diene Woakjen, oo Har, woaren die danken. Aul diene heilje woaren die lowen. 11Dee woaren von dien harlichet Kjennichrikj un von diene Jewault räden, 12soo daut aule Menschen von diene jewaultje Woakjen un de harliche Pracht en dien Kjennichrikj weeten. 13Dien Rikj es een eewjet Rikj, un diene Harschoft hieet niemols opp. Opp däm Harn kjenn wie ons veloten. Hee helt aules waut hee vesproaken haft un jeit met aulem, waut hee jemoakt haft, leeftolich om. 14De Har helt aul dee opprajcht dee doa faulen, un recht de unjadrekjte opp. #Psa 146,8 15Aulemauns Uagen kjikjen no die, un du jefst an to rajchte Tiet daut äten. #(15 un 16) Psa 104,27-28; 136,25 16Du moakst diene Haunt op, un foodascht aules waut läft, daut see saut un tofräd sent. 17De Har es en aul siene Wäaj jerajcht, un truhoatich leeftolich to aules waut hee jemoakt haft. 18De Har es aul dee noaun, dee am aunroopen, aul dee, dee am en Woarheit aunroopen. 19Hee stalt dee tofräd, dee am ferchten. Hee hieet wan see schrieen un halpt an. #Spr 10,24 20De Har woakt äwa aul dee, dee am goot sent, oba de gottloose woat hee aula ombrinjen. 21Ekj well dän Harn lowen. Lot aules waut Odem haft emma un eewich sienen heiljen Nomen lowen.

Currently Selected:

Psalmen 145: PB

Highlight

Compare

Copy