Psalmen 144

144

Dän Kjennich sien Jebäd

1Een Psalm von David. Ekj low däm Harn, dee mie secha helt, dee miene Henj kjriejen lieet un miene Finjasch reedmoakt toom Kjrich, 2mien Leeftolja un miene vesechade Staut, mien huaga Torm un mien Heilant, mien Schilt, un dee, bie wäm ekj Tooflucht näm, dee mie äwa mien Volkj rejieren moakt. #Psa 18,3

3Oo Har, waut sent Menschen, daut du an aunerkjanst, ooda de Menschenkjinja, daut du aun an denkjst? 4Een Mensch es mau soo aus een Loft Odem; siene Läwestiet, soo aus een veschwinjenda Schauten. #Hiob 14,2

5Trakj dienen Himmel uteneen, oo Har, un komm rauf; steet de Boaj aun, daut dee rieekjren. #(5-7) Psa 18,10-17 6Lot daut blitzen un vestrei de Fiend; scheet diene Blitzstrolen, daut see ut Angst wajch ranen. 7Strakj diene Haunt von huach bowen rauf; rad mie, trakj mie ut daut jewaultje Wota, ut de framde äare Henj, 8dee äa Mul voll Läajes haben, un dee äare rajchte Haunt opphäwen un schwieren, un doch nich de Woarheit räden.

9Ekj woa die, oo Gott, een nieet Leet väasinjen. Ekj woa die opp eene tieenseidje Hoap sinjent lowen, #Psa 33,3 10die, dee du Kjennichs jewennen latst, un David, dienen Deena, vom merdarischen Schwieet ratst. 11Rad mie un halp mie ut de framde äare Henj rut, dee äa Mul voll Läajes haben un äare rajchte Haunt opphäwen un schwieren un doch nich de Woarheit räden.

12Dan woaren onse Säns en äare junge Joaren soo stonen aus voljewosne Plaunten, un onse Dajchta soo aus straume utjeschnizte Akjstendasch, dee een Paulaust zieren. 13Onse Spikjasch woaren voll aulahaunt Väarot sennen. Onse Schop woare sikj opp onse Weid Stapen bie dusende un tieen dusende vemieren. 14Onse Ossen woaren schwoare Fuaren fieren. Doa woaren kjeene Wenj derchjebroaken woaren. Doa woat nich mea faustjenomen woaren. Doa woat kjeen Kloagenjeschrech mea opp onse Gaussen sennen. 15Jesäajent es daut Volkj fa dän dit soo es. Jesäajent es daut Volkj dän äa Gott de Har es. #5Mo 33,29

Currently Selected:

Psalmen 144: PB

Highlight

Compare

Copy